បេក្ខជនប្រធានាធិបតីអាមេរិក របស់គណបក្សសាធារណរដ្ឋ លោក ដូណាល់ ត្រាំ (Donald Trump) បានធ្វើព្រឹត្តិការណ៍ជួបជុំយុទ្ធនាការបោះឆ្នោតនៅទីវាលខាងក្រៅជាលើកដំបូងរបស់ខ្លួនកាលពីថ្ងៃពុធ (២១ សីហា) ចាប់តាំងពីហេតុការណ៍ប៉ុនប៉ងធ្វើឃាត ដោយបានបន្តវាយប្រហារទៅលើគូប្រជែងបក្សប្រជាធិបតេយ្យ គឺលោកស្រី កាម៉ាឡា ហារីស (Kamala Harris) ពីក្រោយរនាំងកញ្ចក់ការពារគ្រាប់កាំភ្លើងនៅឯការប្រមូលផ្តុំមួយក្នុងរដ្ឋ ណស ខារ៉ូឡាញណា (North Carolina)។

លោក Trump វ័យ ៧៨ឆ្នាំ បានរិះគន់លោកស្រី Harris ដោយហៅបេក្ខភាពបក្សប្រជាធិបតេយ្យរូបនេះថាជា «អ្នកឆ្វេងនិយមជ្រុលខ្លាំងបំផុត» ដែលមិនធ្លាប់ពីមុនមានក្នុងការប្រជែងតំណែងសេតវិមាន ហើយបានអះអាងថាការងាររបស់មនុស្សរាប់លាននាក់នឹងត្រូវ «បាត់បង់ក្នុងមួយប៉ព្រិចភ្នែក» ប្រសិនបើលោកស្រី Harris ឈ្នះឆ្នោតក្នុងខែវិច្ឆិកា។

បេក្ខភាពបក្សសាធារណរដ្ឋរូបនេះបានប្រាប់ហ្វូងមនុស្សថា «ការងារចិញ្ចឹមជីវិតរបស់ជនជាតិអាមេរិកនឹងត្រូវបាត់បង់ទាំងស្រុង»។ លោក Trump បន្តថា «ប្រសិនបើលោកស្រី Kamala Harris ឈ្នះឆ្នោតខែវិច្ឆិកានេះ សង្គ្រាមលោកលើកទី៣ ស្ទើរតែត្រូវបានធានាថានឹងកើតឡើង»។

ដោយលោកស្រី Harris ទាក់ទាញបានការគាំទ្រខ្លាំងចាប់តាំងពីជំនួសបេក្ខភាពលោកប្រធានាធិបតី Joe Biden មក ព្រឹត្តិការណ៍នៅទីក្រុង អាស្ហេបូរ៉ូ (Asheboro) មួយនេះគឺជាឱកាសសម្រាប់លោក Trump ក្នុងការដណ្តើមយកភាពលេចធ្លោដ៏យូររបស់ខ្លួនមកវិញ។ នេះជាព្រឹត្តិការណ៍នៅខាងក្រៅដ៏ធំជាលើកដំបូង ចាប់តាំងពីលោក Trump បានរងរបួសស្រាលក្នុងការប៉ុនប៉ងធ្វើឃាតក្នុងព្រឹត្តិការណ៍ស្រដៀងគ្នានេះនៅទីក្រុង បាត់ល័រ (Butler) រដ្ឋ ផិនស៊ីលវេនៀ (Pennsylvania) កាលពីមួយខែមុន៕