ថៃ៖ អគ្គិភ័យនៅទីក្រុងប៉ាតាយ៉ា ជាទីក្រុងរមណីយដ្ឋានមាត់សមុទ្រប្រទេសថៃនៅភាគអាគ្នេយ៍នៃទីក្រុងបាងកក ដែលត្រូវបានគេស្គាល់ទូទាំងពិភពលោកថា ជាកន្លែងកម្សាន្តពេលរាត្រីត្រូវបានអគ្គិភ័យឆេះបំផ្លាញយ៉ាងធ្ងន់ធ្ងរ នូវក្លឹបរាត្រីដ៏ធំមួយដែលពេញនិយមសម្រាប់ភ្ញៀវទេសចរឥណ្ឌា។ យោងតាមមន្ត្រីបាននិយាយថា គ្មានអ្នករងរបួស ឬស្លាប់នៅក្នុងហេតុការណ៍អគ្គិភ័យនេះទេ។
Nashaa Club ក៏ដូចជាទីតាំងកម្សាន្តភាគច្រើនត្រូវបានបញ្ជាឲ្យបិទ ខណៈប្រទេសស្ថិតក្រោមវិធានការបិទខ្ទប់របស់រដ្ឋាភិបាល។ លោក Suptawee Ongnonyang ប្រធានទីភ្នាក់ងារបង្ការគ្រោះមហន្តរាយនៅទីក្រុងប៉ាតាយ៉ាបានប្រាប់សារព័ត៌មាន The Associated Press ថា អគ្គិភ័យដែលបានចាប់ផ្ដើមនៅក្នុងក្លឹប បានរាលដាលដល់សំណង់ដែលនៅជាប់គ្នាជាច្រើន នៅលើផ្លូវដើរពេញនិយមរបស់ទីក្រុងដែលត្រូវរងការខូចខាត។ ទីក្រុងប៉ាតាយ៉ាពោរពេញទៅដោយបារ ឌីស្កូ និងភោជនីយដ្ឋាន ដែលមុនពេលមានវីរុសរាតត្បាតមានភ្ញៀវទេសចររាប់លាននាក់គាំទ្រជារៀងរាល់ឆ្នាំ។ វីរុសរាតត្បាតបានបំផ្លាញសេដ្ឋកិច្ចទីក្រុង បន្ទាប់ពីប្រទេសថៃបានបិទព្រំដែនរបស់ខ្លួនកាលពីខែមេសា ឆ្នាំ២០២០ ចំពោះភ្ញៀវបរទេសភាគច្រើន។
Nashaa Club បានបិទ ក្រោយមកត្រូវបានបើកឡើងវិញនៅខែកុម្ភៈឆ្នាំនេះ ប៉ុន្តែបានបិទម្តងទៀតនៅក្នុងខែមេសា ខណៈប្រទេសថៃបានរងផលប៉ះពាល់ធ្ងន់ធ្ងរពីរលកទី៣ នៃវីរុស COVID-19។ លោក Suptawee បាននិយាយថា អគ្គិភ័យបានរាលដាលយ៉ាងឆាប់រហ័ស ដោយសារតែផ្នែកខ្លះនៃសម្ភារៈការពារសំឡេងដែលបានប្រើនៅក្នុងក្លឹបនេះ ហើយខ្យល់បក់ខ្លាំងបានរាលដាលភ្លើងឆេះដល់អគារចំនួន ៣ផ្សេងទៀតដែលនៅក្បែរនោះ។ លោកនិយាយថា វាត្រូវចំណាយពេលប្រមាណ ២ម៉ោងដើម្បីគ្រប់គ្រងអគ្គិភ័យ ដែលត្រូវបានពន្លត់រហូតដល់ពាក់កណ្តាលយប់។ មូលហេតុអគ្គិភ័យកំពុងត្រូវបានស៊ើបអង្កេត៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
