លោកប្រធានាធិបតីរុស្ស៊ី លោក Vladimir Putin កាលពីថ្ងៃពុធសប្ដាហ៍នេះ បានសាទរទំនាក់ទំនងពាណិជ្ជកម្មដែលកំពុងរីកចម្រើនយ៉ាងខ្លាំងជាមួយប្រទេសចិន អំឡុងជំនួបជាមួយលោកនាយករដ្ឋមន្ត្រីចិនក្នុងទីក្រុងមូស្គូ ខណៈប្រទេសទាំង២រឹតបន្តឹងចំណងមិត្តភាពក្នុងពេលមានការប្រឈមកាន់តែខ្លាំងជាមួយក្រុមប្រទេសមហាអំណាចលោកខាងលិច។

យោងតាមវិមានក្រឹមឡាំង អំឡុងថ្លែងទៅកាន់លោកនាយករដ្ឋមន្ត្រីចិន លីឈាង (Li Qiang) លោក Putin បានលើកឡើងថា ផែនការ និងគម្រោងរួមគ្នាដ៏ធំរបស់រុស្ស៊ី និងចិន ក្នុងវិស័យសេដ្ឋកិច្ច និងមនុស្សធម៌ នឹងបន្តច្រើនឆ្នាំទៀត ។

លោក Li មន្ត្រីជាន់ខ្ពស់លំដាប់ទី២ ក្រោមលោកប្រធានាធិបតី Xi Jinping បានធ្វើដំណើរទៅកាន់ទីក្រុងមូស្គូ សម្រាប់ជំនួបប្រចាំឆ្នាំយូរអង្វែងជាមួយលោកនាយករដ្ឋមន្ត្រីរុស្ស៊ី ដែលផ្ដោតលើសេដ្ឋកិច្ច និងកិច្ចសហប្រតិបត្តិការជាក់ស្ដែង ខណៈវិមានក្រឹមឡាំងបន្តចាប់យកក្រុងប៉េកាំងសម្រាប់មិត្តភាពផ្នែកសេដ្ឋកិច្ច ស្របពេលសង្រ្គាមរុស្ស៊ីនៅអ៊ុយក្រែន កំពុងបន្តនៅឡើយ។

យោងតាមប្រព័ន្ធផ្សព្វផ្សាយរដ្ឋចិន ក្នុងសុន្ទរកថារបស់លោកសម្រាប់ដំណើរទស្សនកិច្ចរយៈពេល៤ថ្ងៃ ទៅកាន់ រុស្ស៊ី លោកនាយករដ្ឋមន្ត្រីចិន បានសាទរកិច្ចខិតខំប្រឹងប្រែងដោយមេដឹកនាំរុស្ស៊ី និងចិនក្នុងការបង្កើតបានសន្ទុះដ៏ខ្លាំងក្លាដើម្បីរឹតចំណងមិត្តភាព និងកិច្ចសហប្រតិបត្តិការទ្វេភាគី។ ក្រោយបញ្ចប់ទស្សនកិច្ចនៅរុស្ស៊ី លោក នឹងទៅកាន់ប្រទេសបេឡារុសដែលជាសម្ព័ន្ធមិត្តរបស់រុស្ស៊ី។ដំណើរនេះក៏កើតឡើងជួននឹងកងកម្លាំងអ៊ុយក្រែន កំពុងចូលទៅជ្រៅក្នុងការវាយលុកឆ្លងព្រំដែនរុស្ស៊ី នៃតំបន់ឃើស រយៈពេល២សប្ដាហ៍កន្លងមកនេះ៕