នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានបដិសេធកាលពីថ្ងៃពុធថា លោកមិនបានយល់ព្រមដកកងកម្លាំងយោធាចេញពីព្រំដែនហ្កាហ្សា-អេហ្ស៊ីប ដែលជាផ្នែកនៃកិច្ចព្រមព្រៀងបទឈប់បាញ់ដ៏មានសក្តានុពលជាមួយក្រុមហាម៉ាស។ នេះបើយោងតាមសេចក្តីថ្លែងការណ៍ពីការិយាល័យរបស់លោក។

ទូរទស្សន៍ Kan TV ដែលគ្រប់គ្រងដោយរដ្ឋរបស់អ៊ីស្រាអែល ធ្លាប់បានអះអាងថា សំណើរួមដែលគាំទ្រដោយសហរដ្ឋអាមេរិកបច្ចុប្បន្នសម្រាប់បទឈប់បាញ់នៅតំបន់ហ្កាហ្សា និងការដោះលែងចំណាប់ថ្នូរដែលរដ្ឋមន្ត្រីការបរទេសអាមេរិក លោក អង់តូនី ប្ល៊ីនខិន បានប្រកាសកាលពីថ្ងៃចន្ទថា អ៊ីស្រាអែលបានទទួលយក រួមមានការដកកងទ័ពអ៊ីស្រាអែលចេញពីច្រករបៀង Philadelphia ដែលជាតំបន់ព្រំដែនដ៏សំខាន់រវាងតំបន់ហ្សាស្ទ្រីប និងអេហ្ស៊ីប។ 

តាមសេចក្តីរាយការណ៍ ទាំងក្រុមហាម៉ាស និងអេហ្ស៊ីបដែលជាអ្នកសម្រុះសម្រួលដ៏សំខាន់ក្នុងការចរចានេះ ប្រឆាំងនឹងការគ្រប់គ្រងរបស់អ៊ីស្រាអែលលើច្រករបៀង។

លោក ណេតាន់យ៉ាហ៊ូ បានហៅរបាយការណ៍នេះថា «មិនត្រឹមត្រូវ» ហើយបានសង្កត់ធ្ងន់ថា អ៊ីស្រាអែលមិនបានយល់ព្រមបោះបង់ការគ្រប់គ្រងលើតំបន់នោះទេ។ នេះបើយោងតាមសេចក្តីថ្លែងការណ៍ពីការិយាល័យរបស់លោក។

សេចក្តីថ្លែងការណ៍ បានបន្ថែមថា៖«អ៊ីស្រាអែល នឹងទទូចឲ្យសម្រេចបាននូវគោលបំណងសង្រ្គាមទាំងអស់របស់ខ្លួន ដូចដែលបានកំណត់ដោយគណៈរដ្ឋមន្ត្រីសន្តិសុខ រួមទាំងការធានាថា តំបន់ហ្កាហ្សា នឹងមិនបង្កការគំរាមកំហែងសន្តិសុខដល់អ៊ីស្រាអែលទៀតឡើយ»។