មន្ត្រីក្នុងតំបន់បាននិយាយកាលពីថ្ងៃពុធ (២១ សីហា) ថា មនុស្សយ៉ាងហោចណាស់ ២៤នាក់បានស្លាប់ បន្ទាប់ពីទូកដែលដឹកលើសទម្ងន់មួយគ្រឿង បានក្រឡាប់នៅក្នុងទន្លេនៃខេត្ត ម៉ៃដុមបេ (Mai-Ndombe) របស់ប្រទេសកុងហ្គោ ហើយចំនួនអ្នកស្លាប់ត្រូវបានគេរំពឹងថានឹងកើនឡើងបន្ថែមទៀត ខណៈអ្នកដំណើរជាច្រើនកំពុងបាត់ខ្លួន។

អ្នកគ្រប់គ្រងដែនដី គូទូ (Kutu) លោក ជែកកេស ហ្សិនហ្សា (Jacques Nzenza) បានប្រាប់សារព័ត៌មានរ៉យទ័រថា ទូកដែលផ្ទុកអ្នកដំណើរពី ២៥០ ទៅ ៣០០នាក់នោះ បានក្រឡាប់កាលពីយប់ថ្ងៃអាទិត្យ បន្ទាប់ពីបានបុកនឹងគល់ឈើនៅក្រោមទឹក ដោយការដឹកលើសទម្ងន់គឺជាមូលហេតុចម្បងនៃគ្រោះថ្នាក់។ 

លោក ហ្វីដេលេ លីហ្សូរីងហ្គោ (Fidele Lizoringo) មេដឹកនាំសង្គមស៊ីវិលនៅក្នុងដែនដីនេះបាននិយាយថា មនុស្ស ៤៣នាក់បានរួចជីវិត ប៉ុន្តែអ្នកភូមិដែលកំពុងមានកំហឹងបានវាយដំអ្នកគ្រប់គ្រងទូក ដោយសារតែសាច់ញាតិរបស់ពួកគេខ្លះបានស្លាប់នៅក្នុងឧបទ្ទវហេតុនេះ។

គ្រោះថ្នាក់ដែលធ្វើឱ្យមានមនុស្សស្លាប់ដោយការធ្វើដំណើរតាមទន្លេ និងទូក គឺជារឿងធម្មតាទៅហើយនៅក្នុងប្រទេសអាហ្រ្វិកកណ្តាលមួយនេះ ដែលមានផ្លូវក្រាលកៅស៊ូតិចតួចបំផុតឆ្លងកាត់ទឹកដីដ៏ធំល្វឹងល្វើយ ដែលសម្បូរដោយព្រៃឈើរបស់ខ្លួន ហើយទូក ឬនាវាជាច្រើនតែងតែផ្ទុកលើសចំណុះ៕