ចិន៖ មន្ត្រីនៅក្នុងទីក្រុងមួយនៅភាគខាងត្បូងប្រទេសចិន ដែលកំពុងព្យាយាមទប់ស្កាត់ការផ្ទុះឡើងវីរុសឆ្លងបានប្រាប់សាធារណជនថា កុំធ្វើដំណើរ ដោយបានផ្អាកសេវាកម្មរថយន្តក្រុង និងរថភ្លើង និងបានបិទរោងភាពយន្ត បារ និងទីតាំងផ្សេងៗទៀត។
រដ្ឋាភិបាលទីក្រុងបានប្រកាសថា នរណាម្នាក់ដែលត្រូវការចាកចេញពីទីក្រុង Putian ដែលមានប្រជាជន ២,៩លាននាក់នៅខេត្ត Fujian ភាគខាងត្បូងទីក្រុងសៀងហៃ សម្រាប់ការធ្វើដំណើរចាំបាច់ត្រូវតែមានភស្តុតាង នៃការធ្វើតេស្តរកវីរុសឆ្លងអវិជ្ជមានក្នុងរយៈពេល ៤៨ម៉ោងចុងក្រោយ។ ប្រទេសចិនបានប្រកាសពីការផ្ទុះឡើងវីរុសឆ្លង ស្ថិតនៅក្រោមការគ្រប់គ្រងកាលពីដើមឆ្នាំ២០២០ ប៉ុន្តែបានទទួលរងនូវការផ្ទុះឡើងវីរុសបំប្លែងខ្លួនថ្មី Delta ដែលមានការឆ្លងរាលដាលខ្ពស់។ អាជ្ញាធរនិយាយថា ករណីភាគច្រើនគឺជាប់ពាក់ព័ន្ធនឹងអ្នកដំណើរដែលធ្វើដំណើរមកពីប្រទេសរុស្ស៊ី មីយ៉ាន់ម៉ា និងបណ្ដាប្រទេសដទៃទៀត។
យោងតាមគណៈកម្មការសុខាភិបាលជាតិបានឲ្យដឹងថា នៅទីក្រុង Putian ការឆ្លងវីរុសថ្មីចំនួន ១៥ករណីដែលត្រូវបានរាយការណ៍ថារកឃើញនៅក្នុងស្រុក។ ភោជនីយដ្ឋាន និងផ្សារទំនើបត្រូវបានប្រាប់ឱ្យពិនិត្យយ៉ាងតឹងរ៉ឹងនូវចំនួនអតិថិជន និងពិនិត្យមើលសីតុណ្ហភាពគ្រុនក្តៅ។ សាលារៀនត្រូវបានបញ្ជាតម្រូវឱ្យសិស្សពាក់ម៉ាស់នៅក្នុងថ្នាក់រៀន។ គណៈកម្មការសុខភាពបានប្រកាសថា អ្នកជំនាញត្រូវបានបញ្ជូនទៅទីក្រុង Putian ដើម្បីពិនិត្យការគ្រប់គ្រងករណីឆ្លងវីរុស។ ប្រទេសចិនបានរាយការណ៍ថា មានអ្នកស្លាប់ដោយសារជំងឺឆ្លងវីរុស COVID-19 ចំនួន ៤.៦៣៦នាក់ ក្នុងចំណោមករណីឆ្លង ៩៥.២៤៨ករណី៕
អត្ថបទ៖ ប៊ុន ថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
