រដ្ឋអាជ្ញាអាមេរិក បានចោទប្រកាន់ពីបទឧក្រិដ្ឋប្រឆាំងនឹងអ្នកប្រឆាំងជនជាតិចិនម្នាក់ ដែលរស់នៅក្នុងសហរដ្ឋអាមេរិក ដោយចោទប្រកាន់គាត់ថា ជាភ្នាក់ងារនៃសេវាស៊ើបការណ៍សម្ងាត់របស់ទីក្រុងប៉េកាំង។

ក្រសួងយុត្តិធម៌អាមេរិក (DOJ) បាននិយាយនៅក្នុងសេចក្តីថ្លែងការណ៍មួយថា លោក Yuanjun Tang មានអាយុ ៦៧ឆ្នាំ ត្រូវបានចាប់ខ្លួនកាលពីថ្ងៃពុធ នៅទីក្រុងញូវយ៉ក។

លោក ត្រូវបានគេចោទប្រកាន់ថា បានតាមស៊ើបយកការណ៍លើក្រុមសកម្មជនប្រជាធិបតេយ្យ និងអ្នកប្រឆាំងចិន ដែលមានមូលដ្ឋាននៅសហរដ្ឋអាមេរិក។

លោក Tang បច្ចុប្បន្នជាពលរដ្ឋអាមេរិក ក៏ត្រូវបានចោទប្រកាន់ថា បានធ្វើរបាយការណ៍មិនពិតទៅឲ្យFBIដែរ។ សារព័ត៌មាន BBC មិនអាចទាក់ទងមេធាវីរបស់លោក Tang បាន ភ្លាមៗទេ។

នៅក្នុងសេចក្តីថ្លែងការណ៍កាលពីថ្ងៃពុធ ក្រសួងយុត្តិធម៌ បាននិយាយថា លោក Tang «ត្រូវបានចោទប្រកាន់ ដោយពាក្យបណ្តឹងព្រហ្មទណ្ឌពីបទប្រព្រឹត្ត និងសមគំនិតក្នុងសកម្មភាព នៅសហរដ្ឋអាមេរិកជាភ្នាក់ងារដែលមិនបានចុះបញ្ជីរបស់សាធារណរដ្ឋប្រជាមានិតចិន (PRC) និងធ្វើរបាយការណ៍មិនពិតទៅឲ្យFBI» ។

ក្រសួង ក៏បានចោទប្រកាន់ថា រវាងឆ្នាំ ២០១៨ និង ២០២៣ លោកបានដើរតួជាភ្នាក់ងាររបស់ប្រទេសចិនតាមបញ្ជារបស់ក្រសួងសន្តិសុខរដ្ឋរបស់ប្រទេសនេះ (MSS) ដែលជាទីភ្នាក់ងារស៊ើបការណ៍សម្ងាត់ស៊ីវិលសំខាន់របស់ប្រទេសចិន។