​

ក្រសួងសុខាភិបាលប្រទេសស៊ូដង់ បានរាយការណ៍កាលពីថ្ងៃពុធថា ភ្លៀងធ្លាក់ខ្លាំង និងទឹកជំនន់ ក្នុងរដូវវស្សានៅប្រទេសស៊ូដង់ ដែលបានចាប់ផ្តើមពីខែមិថុនា បានបណ្តាលឲ្យមនុស្ស ១១៤ នាក់ស្លាប់។

នាយកដ្ឋានសង្គ្រោះបន្ទាន់សរទរដូវរបស់ក្រសួង បាននិយាយនៅក្នុងសេចក្តីថ្លែងការណ៍ថា ចំនួនអ្នកស្លាប់បានកើនឡើងដល់១១៤នាក់ ហើយអ្នករងរបួសចំនួន២៨១នាក់ ត្រូវបានរាយការណ៍។ 

រដ្ឋចំនួន ១០ បានរងផលប៉ះពាល់ ដោយបានធ្វើឲ្យប៉ះពាល់ដល់គ្រួសារចំនួន ២៧.២៧៨គ្រួសារនិងបុគ្គល ១១០.២៧៨នាក់។

កាលពីថ្ងៃទី១០ខែសីហា ក្រសួងបានរាយការណ៍ថា អ្នកស្លាប់ចំនួន៥៣នាក់ និងរបួស២០៨នាក់ដោយសារទឹកជំនន់ និងភ្លៀងធ្លាក់ ក្នុងរដ្ឋចំនួន៩ក្នុងអំឡុងខែមិថុនា និងខែកក្កដា។ 

ទឹកជំនន់ គឺជាបញ្ហាកើតឡើងដដែលៗនៅស៊ូដង់ ដែលជាធម្មតាកើតឡើងនៅចន្លោះខែមិថុនា ដល់ខែតុលា។ ភ្លៀងធ្លាក់ខ្លាំង កាលពីពេលថ្មីៗនេះ បានបណ្តាលឲ្យបាត់បង់ជីវិតមនុស្ស សត្វ និងខូចខាតដីកសិកម្ម យ៉ាងច្រើន។

រដូវវស្សានៅឆ្នាំនេះ បានធ្វើឱ្យវិបត្តិមនុស្សធម៌នៅក្នុងប្រទេសស៊ូដង់កាន់តែធ្ងន់ធ្ងរឡើង ដែលកំពុងប្រឈមមុខរួចទៅហើយទៅនឹងជម្លោះដ៏បង្ហូរឈាម រវាងកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សយោធាប៉ារ៉ា។