​

អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃពុធ បានជំរុញសហគមន៍អន្តរជាតិ ឱ្យវិនិយោគខ្យល់ស្អាត ដើម្បីជួយសង្គ្រោះជីវិត និងប្រយុទ្ធប្រឆាំងបម្រែបម្រួលអាកាសធាតុ។

នៅក្នុងសាររបស់លោក ក្នុងទិវាខ្យល់ស្អាតអន្តរជាតិសម្រាប់ផ្ទៃមេឃពណ៌ខៀវ(Blue Skies) ដែលនឹងប្រារព្ធធ្វើនៅថ្ងៃទី៧ ខែកញ្ញា ប្រមុខអង្គការសហប្រជាជាតិ និយាយថា «៩៩ភាគរយនៃមនុស្សជាតិ ដកដង្ហើមខ្យល់បំពុល ដែលនាំឱ្យមានការស្លាប់មុនអាយុប្រហែល៨លាននាក់ រួមទាំងកុមារជាង ៧០០.០០០នាក់ មានអាយុក្រោម៥ ឆ្នាំ។

លោក Guterres បានព្រមានដោយសង្កត់ធ្ងន់ថា កង្វក់បរិយាកាសកំពុងធ្វើឲ្យរាំងស្ទះដល់សេដ្ឋកិច្ច និងឡើងកម្តៅភពផែនដី និងបង្កឲ្យមានអគ្គិភ័យពីវិបត្តិអាកាសធាតុ ។

លោក Guterres បានគូសបញ្ជាក់ពីសកម្មភាព ទាំងរដ្ឋាភិបាល និងធុរកិច្ច គួរតែអនុវត្ត៖ បញ្ឈប់ឥន្ធនៈហ្វូស៊ីល ពង្រឹងការត្រួតពិនិត្យគុណភាពខ្យល់ ពង្រឹងស្តង់ដារគុណភាពខ្យល់ ជំរុញថាមពលកកើតឡើងវិញ កសាងការដឹកជញ្ជូនប្រកបដោយនិរន្តរភាព និងប្រព័ន្ធគ្រប់គ្រងសំណល់ប្រកបដោយនិរន្តរភាព សម្អាតខ្សែច្រវ៉ាក់ផ្គត់ផ្គង់ និងកាត់បន្ថយការបំភាយឧស្ម័ន ដែលបង្កគ្រោះថ្នាក់។

ប្រមុខអង្គការសហប្រជាជាតិ ក៏បានអំពាវនាវដល់អង្គការអភិវឌ្ឍន៍ ស្ថាប័នហិរញ្ញវត្ថុ និងមនុស្សជាតិ ឱ្យប្តូរទិសដៅដើមទុនហិរញ្ញវត្ថុនៅពីក្រោយបច្ចេកវិទ្យាខ្យល់ស្អាត ដើម្បីដោះស្រាយវិបត្តិ រួមមាន ការកង្វក់បរិយាកាស វិបត្តិអាកាសធាតុ ការបាត់បង់ជីវចម្រុះ។ លោកបាននិយាយបន្តថា សំខាន់ជាងនេះទៅទៀត យើងត្រូវតែធ្វើការរួមគ្នាក្នុងកម្រិតតំបន់ និងពិភពលោក។