ក្រុមហ៊ុន Google និងទីភ្នាក់ងារវិទ្យាសាស្ត្រជាតិរបស់អូស្ត្រាលី បានឲ្យដឹងថា ពួកគេនឹងធ្វើការរួមគ្នា ដើម្បីបង្កើតសូហ្វវែរ (កម្មវិធី) ដែលអាចរកឃើញ និងជួសជុលភាពងាយរងគ្រោះរបស់បណ្តាញ ដោយស្វ័យប្រវត្តិ សម្រាប់ប្រតិបត្តិករនៃហេដ្ឋារចនាសម្ព័ន្ធសំខាន់ៗ ដោយនេះជាកិច្ចប្រឹងប្រែងដោះស្រាយជាមួយនឹងការកើនឡើងនៃការវាយប្រហារតាមប្រព័ន្ធអ៊ីនធឺណិត។

កម្មវិធី សម្រាប់ស្ថាប័នជាច្រើន ដូចជាមន្ទីរពេទ្យ ស្ថាប័នការពារជាតិ និងក្រុមហ៊ុនផ្គត់ផ្គង់ថាមពល នឹងត្រូវបានកែសម្រួល ដើម្បីឲ្យស្របតាមបរិយាកាសបទប្បញ្ញត្តិរបស់ប្រទេសអូស្ត្រាលី។

ប្រធានផ្នែកអនុវត្តសុវត្ថិភាព សម្រាប់ Google Cloud (ហ្គូហ្គលក្លោដ) នៅប្រទេសអូស្ត្រាលី និងនូវ៉ែលហ្សេឡង់ គឺលោក Stefan Avgoustakis បាននិយាយថា៖ «ភាពងាយរងគ្រោះនៃខ្សែច្រវាក់ផ្គត់ផ្គង់កម្មវិធី គឺជាបញ្ហាសកល ហើយអូស្ត្រាលី បាននាំមុខក្នុងវិធានការច្បាប់ ដើម្បីគ្រប់គ្រង និងប្រយុទ្ធប្រឆាំងនឹងហានិភ័យទាំងនោះ»។

គួរបញ្ជាក់ថា រដ្ឋាភិបាលអូស្ត្រាលីកំពុងដាក់លក្ខខណ្ឌតឹងរ៉ឹងលើប្រតិបត្តិករហេដ្ឋារចនាសម្ព័ន្ធសំខាន់ៗ ដើម្បីរាយការណ៍ និងទប់ស្កាត់ការវាយប្រហារតាមអ៊ីនធឺណិត បន្ទាប់ពីការរំលោភបំពានបន្តបន្ទាប់ ក្នុងរយៈពេល ២ឆ្នាំចុងក្រោយនេះ បានធ្វើឲ្យព័ត៌មានផ្ទាល់ខ្លួនចំនួនពាក់កណ្តាលនៃប្រជាជន ២៦លាននាក់របស់ប្រទេសនេះត្រូវបានបង្ហាញ។

ភាគីទាំង២ បានឲ្យដឹងនៅក្នុងសេចក្តីថ្លែងការណ៍មួយថា ភាពជាដៃគូស្រាវជ្រាវ នឹងផ្គូផ្គងមូលដ្ឋានទិន្នន័យភាពងាយរងគ្រោះប្រភពបើកចំហដែលមានស្រាប់របស់ក្រុមហ៊ុន Google និងការផ្ទុកក្លោដ (សេវាផ្ទុកទិន្នន័យពីចម្ងាយ) ជាមួយនឹងវិធីសាស្រ្តស្រាវជ្រាវរបស់អង្គការ Commonwealth Scientific & Industrial Research Organisation (Csiro)៕