ស្ថានទូតអាមេរិក ប្រចាំនៅទីក្រុងគីវ បានព្រមានថា ហានិភ័យ គឺមានខ្ពស់ សម្រាប់ការវាយប្រហារដោយមីស៊ីល និងយានដ្រូនរបស់រុស្ស៊ី នៅទូទាំងប្រទេសអ៊ុយក្រែន ក្នុងរយៈពេលប៉ុន្មានថ្ងៃខាងមុខនេះ ខណៈដែលប្រទេសនេះ រៀបចំប្រារព្ធខួប ៣៣ឆ្នាំ គិតចាប់តាំងពីទទួលបានឯករាជ្យពីសហភាពសូវៀត នៅថ្ងៃទី២៤ ខែសីហា។

មេបញ្ជាការជាន់ខ្ពស់របស់អ៊ុយក្រែន លោក Oleksandr Syrskyi នៅដើមសប្តាហ៍នេះ បានប្រាប់ថា រុស្ស៊ីបានបាញ់មីស៊ីលចំនួន ៩.៦០០គ្រាប់ និងបង្ហោះយានដ្រូន ១៤.០០០គ្រឿង ក្នុងអំឡុងពេលវាយប្រហារលើអ៊ុយក្រែន ចាប់តាំងពីប្រទេសនេះបានចាប់ផ្តើមការលុកលុយពេញលេញរបស់ខ្លួន កាលពីខែកុម្ភៈ ឆ្នាំ២០២២។

តាមរយៈសេចក្តីថ្លែងការណ៍ ដែលត្រូវបានបង្ហោះលើគេហទំព័ររបស់ស្ថានទូត កាលពីល្ងាចថ្ងៃពុធ (ទី២១ សីហា) ស្ថានទូអាមេរិក បានលើកឡើងថា៖ «ស្ថានទូតអាមេរិក ក្នុងទីក្រុងគីវ វាយតម្លៃថា ក្នុងរយៈពេលប៉ុន្មានថ្ងៃខាងមុខនេះ និងរហូតដល់ចុងសប្តាហ៍ ហានិភ័យគឺមានខ្ពស់ សម្រាប់ការវាយប្រហារ ដោយយានដ្រូន និងមីស៊ីលរបស់រុស្ស៊ី នៅទូទាំងប្រទេសអ៊ុយក្រែន ផ្សារភ្ជាប់នឹងទិវាបុណ្យឯករាជ្យរបស់អ៊ុយក្រែន នាថ្ងៃទី២៤ ខែសីហា»។

សម្រាប់ប្រជាជនអ៊ុយក្រែន ទិវាបុណ្យឯករាជ្យមានអត្ថន័យកាន់តែពិសេសជាងពេលកន្លងមក គិតចាប់តាំងពីមានការលុកលុយរបស់រុស្ស៊ី ដោយការធ្វើបែបនេះបានបញ្ឆេះអារម្មណ៍ស្នេហាជាតិឲ្យឆាបឆេះ ក្នុងចំណោមប្រជាជនដ៏ច្រើន។

ក្នុងឆ្នាំ២០២៤ នេះ ថ្ងៃប្រារព្ធកើតឡើងជាង ២សប្តាហ៍បន្ទាប់ពីអ៊ុយក្រែន បានចាប់ផ្តើមលុកលុយឆ្លងព្រំដែនដ៏គួរឱ្យភ្ញាក់ផ្អើលចូលទៅក្នុងតំបន់ Kursk របស់រុស្ស៊ី បើទោះបីជាកងទ័ពរុស្ស៊ីរុលទៅមុខជាលំដាប់ នៅភាគខាងកើតអ៊ុយក្រែនក៏ដោយ៕