ភ្នំពេញ៖ កម្លាំងនគរបាលផ្នែក ចរាចរណ៍សណ្ដាប់ធ្នាប់ខណ្ឌ៧មករា ចុះរៀបចំសណ្ដាប់ធ្នាប់ នៅតាមបណ្ដោយផ្លូវស្របសួនច្បារក្ដាន់២ មុខមន្ទីររៀបចំដែនដី និងនគរូបនីយកម្ម ដែលរថយន្តចតពេញផ្លូវ អមសងខាងផ្លូវ បណ្ដាលឲ្យមានការកកស្ទះចរាចរណ៍ពេញផ្លូវ ធ្វើឲ្យបងប្អូនប្រជាពលរដ្ឋលំបាកធ្វើដំណើរ។

ប្រតិបត្តិការការចុះរៀបចំសណ្ដាប់ធ្នាប់នេះ ដោយមានការណែនាំពីលោក លីម សុភា អភិបាល នៃគណៈអភិបាលខណ្ឌ៧មករា អនុញ្ញាតឲ្យលោកវរសេនីយ៍ឯក នេត ស៊ីថុន អធិការនគរបាល​ខណ្ឌ៧មករា ដឹកនាំដោយ​វរសេនីយ៍ត្រី ទឹម វុទ្ធី អធិការរងទទួល​ផែនសណ្ដាប់ធ្នាប់​ចុះរៀបចំ​ នៅព្រឹកថ្ងៃទី១៤ ខែកញ្ញា ឆ្នាំ២០២១នេះ នៅចំណុចផ្លូវស្របសួនក្ដាន់ពីរ មុខមន្ទីររៀបចំដែនដី​ និងនគរូបនីយកម្ម មូលដ្ឋានសង្កាត់មិត្តភាព ខណ្ឌ៧មករា។

លោក វរសេនីយ៍ត្រី ទឹម វុទ្ធី អធិការរងទទួលផែនសណ្ដាប់ធ្នាប់ បានឲ្យដឹងថា​តាមការណែនាំ​របស់​លោក អភិបាលខណ្ឌ គឺដោយមានការយោគយល់គ្នាជាមួយមន្ទីររៀបចំដែនដី និងនគរូបនីយកម្ម ខ្វះចំណត​សម្រាប់មន្រ្តី​អនុញ្ញាតឲ្យចតរថយន្តនៅចិញ្ជើមផ្លូវមួយចំហៀង តែហាមចតអមសង​ខាងផ្លូវ​បង្កការកកស្ទះ បើពុំដូច្នេះទេ កម្លាំងអាជ្ញាធរខណ្ឌនឹងស្ទួច​រថយន្តយកទៅរក្សារទុក​នៅ​អធិកាតដ្ឋាននគរបាលខណ្ឌ ដើម្បីធ្វើការពិន័យតាមច្បាប់៕

អត្ថបទ៖ កុម្ភះ