អ្នកធ្វើធម្មយាត្រារាប់ពាន់នាក់ បានចាប់ផ្ដើមការធ្វើដំណើរដ៏វែងរយៈពេលច្រើនថ្ងៃពីទីក្រុង Baghdad ទៅកាន់ទីក្រុង Kerbala នៅថ្ងៃព្រហស្បតិ៍ (ទី២២ ខែសីហា) នេះ នៅមុនការប្រារព្ធពិធីបុណ្យ Arbaeen របស់អ្នកកាន់សាសនាអ៊ិស្លាមនិកាយស៊ីអ៊ីត។

ដោយត្រូវប្រឈមជាមួយកំដៅព្រះអាទិត្យ និងសីតុណ្ហភាពខ្ពស់ ក្នុងខែសីហា អ្នកគោរពបូជាដ៏ស្មោះស្ម័គ្រនិកាយស៊ីអ៊ីត ដែលខ្លះដើរទាំងជើងទទេរ បានស្វែងរកភាពធូរស្រាលខ្លះៗ នៅតាមតូប និងតង់ជាច្រើនដែលត្រូវបានរៀបចំនៅតាមផ្លូវ ដើម្បីផ្តល់អាហារ ទឹក និងកន្លែងសម្រាកដល់ពួកគេ។

ដោយចេញមកពីតំបន់ផ្សេងៗនៃប្រទេស ពេលទៅដល់ទីក្រុង Baghdad អ្នកធ្វើធម្មយាត្រា នៅតែសល់ចម្ងាយប្រហែល ៩០គីឡូម៉ែត្រ ដើម្បីធ្វើដំណើរទៅដល់ទីក្រុង Kerbala ជាកន្លែងដែលពិធីបុណ្យ Arbaeen នឹងប្រារព្ធព្រឹត្តិការណ៍សំខាន់បំផុត នៅថ្ងៃទី២៥ ខែសីហា។

គួរបញ្ជាក់ថា ពិធីបុណ្យ Arbaeen គឺជាថ្ងៃបញ្ចប់នៃការកាន់ទុក្ខរយៈពេល ២០ថ្ងៃ ចំពោះចៅប្រុសរបស់ព្យាការី Mohammad គឺ Imam Hussein ដែលបានទទួលមរណភាព នៅក្នុងសមរភូមិ ក្នុងឆ្នាំ៦៨០៕