ប្រព័ន្ធផ្សព្វផ្សាយរដ្ឋ KCNA បាននិយាយនៅថ្ងៃសុក្រ (២៣ សីហា) នេះថា ក្រសួងការបរទេសកូរ៉េខាងជើង បានរិះគន់គម្រោងលក់ឧទ្ធម្ភាគចក្រប្រយុទ្ធ អាផាឈី (Apache) របស់សហរដ្ឋអាមេរិក ទៅឱ្យកូរ៉េខាងត្បូង ដោយសន្យាថានឹងចាត់វិធានការបន្ថែមទៀតដើម្បីពង្រឹងការការពារខ្លួន។

មន្ទីរបញ្ចកោណបាននិយាយកាលពីថ្ងៃចន្ទសប្ដាហ៍នេះថា ក្រសួងការបរទេសអាមេរិក បានអនុម័តការលក់ឧទ្ធម្ភាគចក្រ Apache និងជំនួយផ្នែកដឹកជញ្ជូនដែលពាក់ព័ន្ធដល់កូរ៉េខាងត្បូងក្នុងតម្លៃប្រមាណ ៣,៥ពាន់លានដុល្លារ។

មន្ត្រីជាន់ខ្ពស់ដែលមិនបញ្ចេញឈ្មោះទទួលបន្ទុកព័ត៌មានបរទេសនៅក្រសួងការបរទេសកូរ៉េខាងជើង បានចេញសេចក្តីថ្លែងការណ៍មួយកាលពីថ្ងៃព្រហស្បតិ៍ ដោយរិះគន់ផែនការលក់នេះថាជាជំហានបង្កើនភាពតានតឹងកាន់តែខ្លាំងឡើង រួមជាមួយនឹងសមយុទ្ធយោធាប្រចាំឆ្នាំដែលកំពុងបន្តដោយសម្ព័ន្ធមិត្តទាំងពីរ។

មន្ត្រីរូបនេះបានចោទប្រកាន់ក្រុងវ៉ាស៊ីនតោនថា បង្កើនការប្រឈមមុខដាក់គ្នាផ្នែកយោធា «រំខានដល់តុល្យភាពយោធា ហើយបង្កើនគ្រោះថ្នាក់នៃជម្លោះថ្មី» នៅក្នុងតំបន់ដោយការផ្គត់ផ្គង់អាវុធដ៏គ្រោះថ្នាក់ដល់សម្ព័ន្ធមិត្តនានារបស់ខ្លួន។

សេចក្តីថ្លែងការណ៍បានបន្ថែមថា «ការរារាំងជាយុទ្ធសាស្ត្ររបស់ទីក្រុងព្យុងយ៉ាង នឹងត្រូវបានពង្រឹងបន្ថែមទៀតដើម្បីការពារសន្តិសុខ និងផលប្រយោជន៍ជាតិ និងសន្តិភាពក្នុងតំបន់» ដោយបានប្ដេជ្ញាថានឹងធ្វើសកម្មភាពយោធាជាបន្តបន្ទាប់ដើម្បីជំរុញការការពារខ្លួនរបស់កូរ៉េខាងជើង៕