បន្ទាប់ពីជម្លោះដ៏ក្តៅគគុករយៈពេលជាច្រើនសប្តាហ៍មក តុលាការកំពូលរបស់ប្រទេសវេណេស៊ុយអេឡា បានបញ្ជាក់ពីជ័យជម្នះក្នុងការបោះឆ្នោតរបស់ប្រធានាធិបតី លោក Nicolas Maduro។

ការបោះឆ្នោត បានបង្កឱ្យមានការតវ៉ាប្រឆាំងរដ្ឋាភិបាលយ៉ាងខ្លាំងក្លា ដែលក្រោយមកជាអ្វីដែលក្រុមសិទ្ធិមនុស្ស បានចាត់ទុកថាជាការបង្រ្កាបរបស់រដ្ឋបាលរបស់លោក Maduro លើការប្រឆាំង។

មានការចាប់ខ្លួនមន្ត្រីជាន់ខ្ពស់គណបក្សប្រឆាំង និងអ្នកតវ៉ាជាច្រើននាក់ រួមជាមួយការបង្ខំឱ្យបុគ្គលិករដ្ឋ លាលែងពីតំណែង ដោយបានចោទប្រកាន់ថា មានទស្សនៈគាំទ្រគណបក្សប្រឆាំង។

កាលពីថ្ងៃព្រហស្បតិ៍ ប្រធានតុលាការ លោក Caryslia Rodriguez បាននិយាយថា តុលាការកំពូល បានពិនិត្យឡើងវិញសម្ភារៈពីអាជ្ញាធររៀបចំការបោះឆ្នោត ហើយការទទួលជ័យជំ្នះរបស់លោក Maduro មានសុពលភាព។

ទោះជាយ៉ាងណា គណបក្សប្រឆាំងនិយាយថា តុលាការកំពូល គ្មានសិទ្ធិតាមរដ្ឋធម្មនុញ្ញក្នុងការអនុវត្តតួនាទីបោះឆ្នោតណាមួយឡើយ ដោយធ្វើឲ្យការចេញសេចក្តីសម្រេចរបស់តុលាការ ទុកជាមោឃៈ។

គណបក្សប្រឆាំង ដែលដឹកនាំដោយ លោក Edmundo Gonzalez បានចេញផ្សាយលទ្ធផលបោះឆ្នោតដែលផ្តល់ឲ្យលោកក្នុងការគាំទ្រ មានចំនួនដល់៦៧% ។

អាជ្ញាធររៀបចំការបោះឆ្នោត បាននិយាយថា លោក Maduro បានទទួលជ័យជម្នះត្រឹមតែជាងពាក់កណ្តាលនៃសំឡេងឆ្នោត ប៉ុន្តែពុំបានចេញផ្សាយចំនួនសរុបពេញលេញនោះទេ។

ប្រទេសលោកខាងលិចជាច្រើន បានជំរុញឱ្យមានការចេញផ្សាយពេញលេញនៃលទ្ធផលបោះឆ្នោត។ ការផ្តល់សច្ចាប័នរបស់តុលាការកំពូល កាលពីថ្ងៃព្រហស្បតិ៍ ផ្តល់ឱ្យលោក Maduro ដែលបានចូលកាន់តំណែងចាប់តាំងពីឆ្នាំ ២០១៣មក នឹងបន្តមួយអាណត្តិរយៈពេល៦ឆ្នាំទៀត ដែលចាប់ផ្តើមនៅក្នុងខែមករា។