អនុប្រធានាធិបតីងាមេរិក លោកស្រី Kamala Harris បានទទួលយកជាផ្លូវការនូវការតែងតាំងពីគណបក្សប្រជាធិបតេយ្យ សម្រាប់តំណែងប្រធានាធិបតី កាលថ្ងៃព្រហស្បតិ៍ (ទី២២ ខែសីហា) ហើយលោកស្រីបានអំពាវនាវយ៉ាងខ្លាំងក្លាឲ្យបញ្ចប់សង្រ្គាម នៅតំបន់ហ្កាហ្សា និងប្រយុទ្ធប្រឆាំងនឹងការប្រើប្រាស់អំណាចជិះជាន់ នៅជុំវិញពិភពលោក ដោយបានបង្ហាញឲ្យឃើញនូវភាពផ្ទុយគ្នាស្រឡះពីលោក Donald Trump បេក្ខជនរបស់គណបក្សសាធារណរដ្ឋ។

ដោយចោទប្រកាន់លោក Trump ថា បានចុះញ៉មជាមួយជនប្រើអំណាចជិះជាន់ លោកស្រី Harris បាននិយាយថា៖ «នៅក្នុងការតស៊ូដ៏យូរអង្វែង រវាងលទ្ធិប្រជាធិបតេយ្យ និងរបបប្រើអំណាចជិះជាន់ ខ្ញុំដឹងច្បាស់ថា ខ្ញុំឈរនៅទីណា ហើយខ្ញុំដឹងថា សហរដ្ឋអាមេរិកមានជំហរបែបណា»។

នៅថ្ងៃចុងក្រោយ ហើយនិងត្រូវបានបរំពឹងទុកបំផុតនោះ យប់នៃមហាសន្និបាតរយៈពេល ៤ថ្ងៃ នៅទីក្រុង Chicago លោកស្រី Harris វ័យ ៥៩ឆ្នាំ បានប្រឹងប្រែងបង្ហាញពីភាពខុសប្លែករបស់ខ្លួនឯងទៅកាន់សាធារណជនអាមេរិក ខណៈដែលលោកស្រី និងលោក Trump វ័យ ៧៨ឆ្នាំ ចូលដល់ ១១សប្តាហ៍ចុងក្រោយនៃយុទ្ធនាការបោះឆ្នោតដ៏ស្វិតស្វាញរបស់សហរដ្ឋអាមេរិក។

បន្ទាប់ពីមានការតវ៉ាជាច្រើនថ្ងៃពីអ្នកគាំទ្រប៉ាឡេស្ទីន ដែលបានខកចិត្តក្នុងការមិនទទួលបានកន្លែងនិយាយនៅឯមហាសន្និបាត លោក Harris បានប្ដេជ្ញាចិត្តនៅក្នុងសុន្ទរកថារបស់លោកស្រី ដោយការធានាសន្តិសុខដល់អ៊ីស្រាអែល នាំយកចំណាប់ថ្នូរចេញពីតំបន់ហ្កាហ្សាត្រឡប់ទៅគេហដ្ឋានរបស់ពួកគេវិញ និងបញ្ចប់សង្គ្រាម នៅក្នុងដែនដីប៉ាឡេស្ទីន។

អមដោយសំឡេងអបអរសាទរ លោកស្រីបានថ្លែងថា៖ «ឥឡូវនេះជាពេលវេលា ដែលត្រូវទទួលបានកិច្ចព្រមព្រៀងចំណាប់ថ្នូរ និងកិច្ចព្រមព្រៀងបទឈប់បាញ់ទាំងស្រុងហើយ»។ ហើយខ្ញុំសូមបញ្ជាក់ឲ្យបានច្បាស់លាស់ថា ខ្ញុំនឹងគាំទ្រជានិច្ចចំពោះសិទ្ធិការពារខ្លួនរបស់អ៊ីស្រាអែល ហើយខ្ញុំនឹងតែងតែធានាថា អ៊ីស្រាអែលមានសមត្ថភាពការពារខ្លួន»។

តែលោកស្រីបានសង្កត់ធ្ងន់ថា៖ «អ្វីដែលបានកើតឡើង នៅហ្កាហ្សា ក្នុងរយៈពេល ១០ខែចុងក្រោយនេះ គឺរងការបំផ្លិចបំផ្លាញធ្ងន់ធ្ងរណាស់។ ជីវិតជនស្លូតត្រង់ជាច្រើន បានបាត់បង់ ហើយមនុស្សម្នាស្រេកឃ្លានដែលគ្មានសង្ឃឹមអ្វីសោះ បានភៀសខ្លួនទៅកាន់សុវត្ថិភាពម្តងហើយម្តងទៀត។ ទំហំនៃការរងទុក្ខ គឺគួរឲ្យតក់ស្លុតណាស់»៕