យោងតាមសេចក្តីថ្លែងការណ៍រួម បានឲ្យដឹងថា ប្រទេសចិន និងបេឡារុស បានព្រមព្រៀងពង្រឹងកិច្ចសហប្រតិបត្តិការ ក្នុងវិស័យជាច្រើន ក្នុងនោះរួមទាំងពាណិជ្ជកម្ម សន្តិសុខ ថាមពល និងហិរញ្ញវត្ថុផងដែរ បន្ទាប់ពីនាយករដ្ឋមន្ត្រីចិន លោក Li Qiang (លី ឈាង) បានជួបជាមួយនាយករដ្ឋមន្ត្រីបេឡារុស លោក Roman Golovchenko (រ៉ូម៉ាន ហ្គូឡូឆេនកូ) នៅទីក្រុងមីនស្ក៍។

សេចក្តីថ្លែងការណ៍ដែលបានចេញផ្សាយនៅថ្ងៃសុក្រ (ទី២៣ ខែសីហា) នេះ ពោលគឺមានរយៈពេលមួយថ្ងៃបន្ទាប់ពីកិច្ចប្រជុំនៅទីក្រុងមីនស្ក៍ បានបង្ហាញដែរថា ប្រទេសទាំង២ ក៏នឹងពង្រឹងកិច្ចសហប្រតិបត្តិការក្នុងខ្សែច្រវាក់ផ្គត់ផ្គង់ឧស្សាហកម្ម និងបន្តពង្រឹងការសម្របសម្រួលពាណិជ្ជកម្ម ដើម្បីកាត់បន្ថយចំណាយ សម្រាប់ការពាក់ព័ន្ធនានារបស់ប្រទេសទាំង២។

ជាមួយគ្នានេះ សេចក្តីថ្លែងការណ៍ដែលចេញផ្សាយដោយក្រសួងការបរទេសចិន ក៏បានឲ្យដឹងដែរថា ប្រទេសបេឡារុសក៏មានបំណងចង់ពង្រឹងកិច្ចសហប្រតិបត្តិការជាមួយតំបន់ Guangdong-Hong Kong-Macau Greater Bay Area (តំបន់ហ្គ្រេតធឺបេរបស់ក្វាងទុង-ហុងកុង-ម៉ាកាវ) ជាតំបន់ដ៏ធំដែលគ្របដណ្តប់ទីក្រុងចំនួន៩ រួមមាន Guangzhou (ហ្គងហ្ស៊ូ) Shenzhen (សេនចេន) និង Zhuhai (ស៊ូហៃ)។

គួរបញ្ជាក់ថា បើយោងតាមសារព័ត៌មាន China Daily បានឲ្យដឹងថា បេឡារុស គឺជាប្រទេសមួយ ក្នុងចំណោមក្រុមដំបូងដែលឆ្លើយតបនឹងគំនិតផ្តួចផ្តើមខ្សែក្រវាត់ និងផ្លូវរបស់ចិន ហើយក្នុងអំឡុងដំណើរទស្សនកិច្ចរបស់លោកទៅកាន់ទីក្រុងមីនស្ក៍ លោក Li បានថ្លែងថា ទំនាក់ទំនងចិន-បេឡារុស្ស នៅតែមានភាពរស់រវើកស្វាហាប់ ក្នុងរយៈពេល ៣២ឆ្នាំកន្លងមកនេះ ទោះបីជាមានការប្រែប្រួលទិដ្ឋភាពជាអន្តរជាតិក៏ដោយ៕