ក្រុមបរិស្ថាននិយាយកាលពីថ្ងៃព្រហស្បតិ៍ថា ស្របពេលដែលប្រេស៊ីលព្យាយាមបង្រ្កាបការជីករ៉ែមាសខុសច្បាប់នៅតំបន់ព្រៃជប់ភ្លៀងអាម៉ាហ្សូន ក្រុមអ្នកជីករ៉ែខុសច្បាប់រាប់ពាន់នាក់ បានប្រមូលផ្តុំគ្នានៅរដ្ឋកសិកម្ម Mato Grosso ។

រូបថតសន្លឹកដ៏គួរឲ្យភ្ញាក់ផ្អើលបង្ហាញដីគ្មានព្រៃ ហើយត្រូវបានជីកដោយក្រុមអ្នកជីករ៉ែនោះ ថតបានពីលើយន្តហោះរបស់ក្រុមបរិស្ថានកាលពីថ្ងៃពុធ ហើយនិងឃើញអណ្តូងរ៉ែនៅលើដែនអភិរក្សជនជាតិដើមភាគតិច Sarare ។

ក្រុមបរិស្ថាន បានលើកឡើងពីការប៉ាន់ប្រមាណរបស់ក្រុមរដ្ឋអាជ្ញាសហព័ន្ធថា មាននូវកម្មករជីករ៉ែខុសច្បាប់ ៥ពាន់នាក់ នៅលើទីតាំងនោះ ហើយចំនួននេះ បានហក់ឡើងខ្ពស់ ចាប់តាំងពីឆ្នាំមុនមកម្ល៉េះ បើទោះបីជាមានកិច្ចខិតខំពង្រឹងច្បាប់ដោយក្រុមនគរបាល និងទីភ្នាក់ងារការពារបរិស្ថាន Ibama របស់រដ្ឋាភិបាលប្រេស៊ីលក៏ដោយ ។

លោកប្រធានាធិបតី Luiz Inacio Lula da Silva បានសន្យាលុបបំបាត់ចោលការជីករ៉ែខុសច្បាប់ពីដែនដីអភិរក្សារបស់ជនជាតិដើមភាគតិច និងការត់បន្ថយការកាប់បំផ្លាញព្រៃឈើខុសច្បាប់មកនៅកម្រិតសូន្យ នាចុងអាណត្តិរបស់លោកក្នុងឆ្នាំ ២០២៦ ។

កាលពីឆ្នាំមុននៅតំបន់ព្រៃជប់ភ្លៀងអាម៉ាហ្សូន យោធា និងកងកម្លាំងនគរបាលរដ្ឋាភិបាលរបស់លោក Silva បានចុះប្រតិបត្តិការ ដើម្បីបណ្តេញក្រុមអ្នកជីករ៉ែមាសរាប់ពាន់នាក់ ចេញពីដែនដី Yanomami គឺជាតំបន់អភិរក្សធំបំផុតរបស់ប្រេស៊ីលមានទំហំស្មើប្រទេសព័រទុយហ្គាល់ ស្ថិតនៅព្រំដែនភាគខាងជើងរបស់ពួកគេ ជាប់ប្រទេសវេណេស៊ុយអេឡា ៕