មេដឹកនាំកោះតៃវ៉ាន់ លោក ឡៃ ឆឹងទ័រ (Lai Ching-te) បាននិយាយនៅថ្ងៃសុក្រ (២៣ សីហា) នេះថា កោះតៃវ៉ាន់ ចង់បន្តរបៀបរស់នៅដោយសេរីរបស់ខ្លួន និងបន្តច្រានចោលការគ្រប់គ្រងរបស់ប្រទេសចិន ក្នុងទស្សនកិច្ចនៅកោះជួរមុខមួយរវាងភាគីទាំងពីរដើម្បីប្រារព្ធការរម្លឹកដល់សង្រ្គាមដ៏សំខាន់មួយជាមួយកងកម្លាំងចិន។

តៃវ៉ាន់បានគ្រប់គ្រងកោះ ឃិនមិន (Kinmen) និង ម៉ាត់ស៊ូ (Matsu) ដែលស្ថិតនៅក្បែរឆ្នេរសមុទ្រប្រទេសចិន ចាប់តាំងពីរដ្ឋាភិបាលសាធារណរដ្ឋចិន (កោះតៃវ៉ាន់បច្ចុប្បន្ន) បានភៀសខ្លួនទៅក្រុងតៃប៉ិក្នុងឆ្នាំ១៩៤៩ បន្ទាប់ពីចាញ់សង្គ្រាមស៊ីវិលជាមួយមេដឹកនាំកុម្មុយនិស្តលោក ម៉ៅ សេទុង (Mao Zedong)។ ពុំមានសន្ធិសញ្ញាសន្តិភាព ឬបទឈប់បាញ់ណាមួយត្រូវបានចុះហត្ថលេខាឡើយនៅពេលនោះ។

ក្នុងដំណើរទស្សនកិច្ចលើកដំបូងទៅកាន់កោះ Kinmen ចាប់តាំងពីចូលកាន់តំណែងក្នុងខែឧសភា លោក Lai បាននិយាយថា តៃវ៉ាន់ត្រូវតែតតាំងនឹងការគំរាមកំហែងរបស់ប្រទេសចិន ហើយកោះនេះចង់បន្តជីវិតបែបប្រជាធិបតេយ្យ សេរីភាព សិទ្ធិមនុស្ស និងនីតិរដ្ឋ ហើយនិងចំណាយបន្ថែមទៀតលើវិស័យយោធ។

កោះតៃវ៉ាន់ កាលពីថ្ងៃអង្គារ បានបង្ហាញកម្លាំងមីស៊ីលរបស់ខ្លួនដោយការសាកល្បងមីស៊ីលបាញ់ពីដីទៅអាកាសនៅមូលដ្ឋានសាកល្បងដ៏រសើបមួយនៅលើផ្នែកដាច់ស្រយាលនៃតំបន់ឆ្នេរសមុទ្រភាគអាគ្នេយ៍របស់កោះ។ ប្រទេសចិន ចាត់ទុកកោះស្វ័យគ្រប់គ្រងតៃវ៉ាន់ជាទឹកដីរបស់ខ្លួន ហើយបានថ្កោលទោសលោក Lai ម្ដងហើយម្ដងទៀតថាជា «ជនផ្ដាច់ខ្លួនដ៏គ្រោះថ្នាក់»៕