កងទ័ពអាកាសអ៊ុយក្រែនបានបញ្ចេញវីដេអូ កាលពីថ្ងៃព្រហស្បតិ៍ (ទី២២ ខែសីហា) ដោយនិយាយថា ខ្លួនបានប្រើប្រាស់គ្រាប់បែក GBU-39 ផលិតដោយសហរដ្ឋអាមេរិក ដើម្បីវាយប្រហារទីតាំងបញ្ជាការកងអនុសេនាតូចរុស្ស៊ី នៅក្នុងតំបន់ Kursk របស់ប្រទេសរុស្ស៊ី ជាកន្លែងដែលអ៊ុយក្រែនបានធ្វើការលុកលុយឆ្លងព្រំដែន។

ពាក់ព័ន្ធនឹងរួបភាពនោះ សារព័ត៌មាន Reuters អាចបញ្ជាក់ទីតាំង តាមរយៈប្លង់ដី ដើមឈើ និងផ្ទះសម្បែងដែលផ្គូផ្គងនឹងរូបភាពផ្កាយរណបនៃតំបន់នោះ។ តែយ៉ាងណាក្ដី សារព័ត៌មាន Reuters មិនអាចផ្ទៀងផ្ទាត់ដោយឯករាជ្យ អំពីកាលបរិច្ឆេទដែលវីដេអូនេះត្រូវបានថតនោះឡើយ ហើយក៏មិនអាចផ្ទៀងផ្ទាត់ដោយឯករាជ្យថា តើអាវុធប្រភេទណាដែលត្រូវបានប្រើប្រាស់នោះ។

សូមបញ្ជាក់ថា សម្ព័ន្ធមិត្តរបស់ទីក្រុងគីវ ក្នុងនោះរួមទាំងសហរដ្ឋអាមេរិក កំពុងផ្គត់ផ្គង់អាវុធដល់កងកម្លាំងអ៊ុយក្រែន ប៉ុន្តែបានដាក់កម្រិតលើរបៀប និងពេលវេលាដែលពួកគេអាចប្រើប្រាស់បាន នៅក្នុងប្រទេសរុស្ស៊ី ដោយសារមានការព្រួយបារម្ភថា ការវាយប្រហារបែបនេះ អាចនឹងជំរុញឲ្យមានការសងសឹកពីរុស្ស៊ី ដែលអូសទាញប្រទេសសមាជិករបស់អង្គការណាតូ (NATO) ឲ្យចូលទៅក្នុងសង្រ្គាមអ៊ុយក្រែន-រុស្ស៊ី៕