ការិយាល័យឧតុនិយមបាននិយាយថា ភ្នំភ្លើងនៅតំបន់ភាគនិរតីអ៊ីសឡង់ បានផ្ទុះកាលពីថ្ងៃព្រហស្បតិ៍ និងព្រួសកម្អែ និងផ្សែងទៅលើអាកាស ដែលជាការផ្ទុះលើកទី ៦របស់វា ចាប់តាំងពីខែធ្នូ ឆ្នាំ២០២៣រហូតមក ។

រូបភាពវីដេអូឃ្លីបថតបាននៅពេលយប់ថ្ងៃព្រហស្បតិ៍ ឃើញកម្អែកាន់តែច្រើនបានបានព្រួសឡើងលើអាកាស ។

ការសិក្សា បានបង្ហាញពីកម្លាំងម៉ាក់ម៉ាខ្លាំងនៅក្រោមដី បង្ខំឲ្យមានការព្រមានពីសកម្មភាពភ្នំភ្លើងថ្មីនៅតំបន់ភាគខាងត្បូងរដ្ឋធានី Reykjavik របស់អ៊ីសឡង់ ។

គួរឲ្យដឹងថា បន្ទុះភ្នំភ្លើងចុងក្រោយនៅឧបទ្វីប Reykjanes របស់អ៊ីសឡង់ ដែលមានពលរដ្ឋរស់នៅប្រហែល ៣ម៉ឺននាក់ ឬស្មើនឹងជិត ៨ភាគរយនៃពលរដ្ឋសរុបនៅក្នុងប្រទេសមួយនេះ បានបញ្ចប់ទៅកាលពីថ្ងៃទី ២២ ខែមិថុនាកន្លងទៅ ក្រោយព្រួសកម្អែអស់រយៈពេល ២៤ថ្ងៃ ។

អ៊ីសឡង់ដែលមានទំហំប្រហាក់ប្រហែលនឹងរដ្ឋ Kentucky របស់សហរដ្ឋអាមេរិក មានភ្នំភ្លើងកម្រើកជាង ៣០ ធ្វើឲ្យប្រទេសកោះនៅអឺរ៉ុបខាងជើងមួយនេះ ក្លាយជាគោលដៅដ៏សំខាន់សម្រាប់ភ្ញៀវទេសចរដែលចង់មើលភ្នំភ្លើងផ្ទុះ ៕