ប្រទេសហ្វីលីពីន នៅថ្ងៃសុក្រ (ទី២៣ ខែសីហា) នេះ បានជំរុញឲ្យអ្នកដើរតាមនាវារបស់ខ្លួន «ចៀសវាង» ពីផ្លូវសមុទ្រក្រហម ខណៈដែលក្រុមឧទ្ទាមហ៊ួទី ដែលមានមូលដ្ឋាននៅប្រទេសយេម៉ែន បានបន្តការវាយប្រហារដោយមីស៊ីល និងយនដ្រូនទៅលើការដឹកជញ្ជូនទំនិញ នៅក្នុងផ្លូវទឹកដ៏សំខាន់នេះ។

ក្រសួងការបរទេសបានប្រាប់ឲ្យដឹងថា «ពលរដ្ឋហ្វីលីពីនគួរតែចៀសវាងពីតំបន់នេះទាំងអស់គ្នា ប្រសិនបើមិនមានភាពចាំបាច់ដល់ជីវភាពរស់នៅរបស់ពួកគេទេនោះ» ដោយលើកឡើងពី «ការកើនឡើងនូវជម្លោះក្នុងសមុទ្រក្រហម ដែលបង្កជាគ្រោះថ្នាក់ជាក់ស្ដែង និងភ្លាមៗ ចំពោះអ្នកដើរនាវាជនជាតិហ្វីលីពីនទាំងអស់ដែលធ្វើការនៅក្នុងតំបន់នោះ»។

គួរបញ្ជាក់ថា ការព្រមាននេះបានកើតឡើងក្រោយមួយថ្ងៃបន្ទាប់ពីជនជាតិហ្វីលីពីន ២៣នាក់ និងសមាជិកនាវិករុស្ស៊ី ២នាក់ ត្រូវបានជួយសង្គ្រោះពីនាវាដឹកប្រេងមានទង់ក្រិកដែលត្រូវបានវាយប្រហារដោយគ្រាប់ផ្លោងជាច្រើនគ្រាប់ចេញពីកំពង់ផែ Hodeida ដែលគ្រប់គ្រងដោយក្រុមឧទ្ទាមយេម៉ែន កាលពីថ្ងៃពុធ (ទី២១ ខែសីហា)។ ការវាយប្រហារលើនាវា Sounion បានបណ្តាលឲ្យមានអគ្គិភ័យ និងកាត់ផ្តាច់ថាមពលម៉ាស៊ីន។

ការវាយប្រហារនោះត្រូវបានអះអាងទទួលខុសត្រូវដោយក្រុមឧទ្ទាមហ៊ួទីគាំទ្រដោយអ៊ីរ៉ង់ ដែលបានធ្វើយុទ្ធនាការប្រឆាំងនឹងការដឹកជញ្ជូនអន្តរជាតិ ដោយពួកគេលើកហេតុផលថា គាំទ្រដល់តំបន់ហ្កាហ្សា ក្នុងអំឡុងពេលមានសង្គ្រាមអ៊ីស្រាអែល និងក្រុមហាម៉ាស៕