តុលាការថៃ នៅថ្ងៃសុក្រ (ទី២៣ ខែសីហា) នេះ បានទទួលយកបណ្តឹងព្រហ្មទណ្ឌ ប្រឆាំងនឹងបុគ្គលិកសន្តិសុខជាន់ខ្ពស់ចំនួន ៧រូប ជុំវិញការចោទប្រកាន់ពីការមានចំណែករបស់ពួកគេ នៅក្នុងការស្លាប់ កាលពី ២ទសវត្សរ៍មុននៃបាតុករមូស្លីមចំនួន ៨៥នាក់ ដែលភាគច្រើនបានថប់ដង្ហើមពេលកំពុងឈរប្រជ្រៀតគ្នា នៅក្នុងរថយន្តយោធា។

យោងតាមមេធាវី ក្នុងសំណុំរឿងនេះ និងអង្គការសិទ្ធិមនុស្ស Amnesty International បានឲ្យដឹងថា មន្ត្រីយោធា និងនគរបាល ត្រូវបានចោទប្រកាន់ពីបទឃាតកម្ម និងការឃុំខ្លួនដោយខុសច្បាប់ ជុំវិញការដោះស្រាយការតវ៉ាឆ្នាំ២០០៤ នៅទីក្រុង Tak Bai ជាឧប្បត្តិហេតុដែលនាំឲ្យមានការថ្កោលទោសជាអន្តរជាតិ និងជួយជំរុញបន្ថែមដល់ការបះបោរ ក្នុងខេត្តនានា ដែលមានអ្នកកាន់សាសនាអ៊ិស្លាមភាគច្រើនរបស់ប្រទេសថៃ ក្បែរប្រទេសម៉ាឡេស៊ី។

លោក Pornpen Khongkachonkiet មេធាវីម្នាក់ក្នុងចំណោមមេធាវីរបស់គ្រួសារជនរងគ្រោះ ៤៨នាក់បានប្រាប់សារព័ត៌មាន Reuters ថា៖ «ដំណើរការរបស់តុលាការអាចផ្តល់យុត្តិធម៌ដល់ជនរងគ្រោះ និងក្រុមគ្រួសាររបស់ពួកគេ ហើយនិងសហគមន៍ដែលបានទទួលរងគ្រោះពីការបង្រ្កាបដ៏អាក្រក់នេះ»។ លោក Pornpen បានបន្ថែមថា តុលាការនឹងកោះហៅជនជាប់ចោទ នៅថ្ងៃទី១២ ខែកញ្ញា។

ហេតុការណ៍ដ៏ល្បីល្បាញ នៅទីក្រុង Tak Bai នេះ បានបង្កជាបញ្ហាដល់លោកនាយករដ្ឋមន្ត្រី ថាក់ស៊ីន ស៊ីណាវ៉ាត់ នាពេលនោះ ហើយករណីនេះជាប់ពាក់ព័ន្ធនឹងអតីតមេទ័ព ប្រចាំតំបន់ លោក Pisan Wattanawongkiri ដែលឥឡូវនេះជាតំណាងរាស្រ្តក្នុងគណបក្សភឿថៃរបស់លោក ថាក់ស៊ីន។

គួរបញ្ជាក់ថា ការទទួលយករបស់តុលាការ ដែលលក្ខន្តិកៈកំណត់អាយុបណ្ដឹង ត្រូវផុតនៅថ្ងៃទី ៥ ខែតុលានោះ កើតមានឡើងតែប៉ុន្មានថ្ងៃបន្ទាប់ពីកូនស្រីរបស់លោក ថាក់ស៊ីន គឺលោកស្រី Paetongtarn Shinawatra ត្រូវបានបញ្ជាក់ថា ជានាយករដ្ឋមន្ត្រីថ្មីរបស់ប្រទេសថៃ៕