សមាគមវេជ្ជសាស្ត្រកូរ៉េខាងត្បូង នៅថ្ងៃសុក្រ (ទី២៣ ខែសីហា) នេះ បានព្រមានថា ការរីករាលដាលនូវករណីនៃជំងឺកូវីដ-១៩ និងការបន្តធ្វើកូដកម្មដោយក្រុមគ្រូពេទ្យហាត់ការ អាចធ្វើឲ្យបន្ទប់សង្គ្រោះបន្ទាន់របស់មន្ទីរពេទ្យមិនដំណើរការ ក្នុងខែកញ្ញា នៅពេលដែលគ្រូពេទ្យជាច្រើន នឹងត្រូវឈប់សម្រាក ដោយសារវិស្សមកាលសាធារណៈ។

តែរដ្ឋាភិបាលបានជំទាស់នឹងហានិភ័យនៃការបិទបន្ទប់សង្គ្រោះបន្ទាន់ ដែលលើកឡើងដោយសមាគមវេជ្ជសាស្ត្រកូរ៉េ (KMA) ហើយបាននិយាយថា ខ្លួនកំពុងផ្តល់ជំនួយបន្ថែមតាមតម្រូវការ។

គួរបញ្ជាក់ថា ក្រុមគ្រូពេទ្យរាប់ពាន់នាក់ ក្នុងរួមទាំងនិស្សិតពេទ្យ និងគ្រូពេទ្យបញ្ចប់ការសិក្សាផងដែរ បាននាំគ្នាដើរចេញពីការងារ កាលពីខែកុម្ភៈ ដើម្បីតវ៉ាប្រឆាំងនឹងផែនការបង្កើនចំនួននិស្សិតពេទ្យដល់ ២.០០០នាក់ ក្នុងមួយឆ្នាំ ដើម្បីឆ្លើយតបទៅនឹងអ្វីដែលអាជ្ញាធប៉ាន់ស្មានថា នឹងមានការខ្វះខាតគ្រូពេទ្យធ្ងន់ធ្ងរ។

រដ្ឋាភិបាលបានប្រាប់ឲ្យដឹងថា មន្ទីរពេទ្យដែលពឹងផ្អែកលើក្រុមគ្រូពេទ្យ ឆ្លងកាត់នីតីវិធីវេជ្ជសាស្ត្រជាច្រើន ត្រូវបង្វែរអ្នកជំងឺទៅបន្ទប់សង្គ្រោះបន្ទាន់ ដោយលើកឡើងពីកង្វះបុគ្គលិក ខណៈដែលគ្រូពេទ្យដែលមានស្រាប់ បានជួបប្រទះនឹងបន្ទុកការងារធ្ងន់ជាងមុន៕