យោងតាមប្រភពព័ត៌មានពីសន្តិសុខបានឱ្យដឹងថា ការវាយប្រហារតាមអាកាសរបស់អ៊ីស្រាអែលនៅភាគខាងត្បូងប្រទេសលីបង់ កាលពីថ្ងៃសុក្រ បានសម្លាប់អ្នកប្រយុទ្ធយ៉ាងហោចណាស់ ៦ នាក់ និងកុមារម្នាក់ ខណៈក្រុមប្រដាប់អាវុធហេសបូឡា បានឆ្លើយតបវិញដោយបាញ់ជុំកាំភ្លើងធំ និងគ្រាប់រ៉ូកែត ឆ្លងកាត់ព្រំដែន។

យោធាអ៊ីស្រាអែល បាននិងកំពុងបាញ់តគ្នាជាមួយក្រុមហេសបូឡាគាំទ្រដោយអ៊ីរ៉ង់ នៅទូទាំងព្រំដែនភាគខាងត្បូងប្រទេសលីបង់ ស្របពេលជាមួយសង្គ្រាមនៅតំបន់ហ្កាហ្សា ដោយជម្លោះបានកើនឡើងនាពេលថ្មីៗនេះ ក្នុងពេលមានការព្រួយបារម្ភថាសង្រ្គាមក្នុងតំបន់អាចផ្ទុះឡើងក្នុងទ្រង់ទ្រាយពេញលេញ។

ការវាយប្រហាររបស់អ៊ីស្រាអែលទៅលើទីក្រុង Mays al-Jabal និងទីក្រុង Tayr Harfa នៅលីបង់ភាគខាងត្បូង កាលពីថ្ងៃសុក្រ បានសម្លាប់អ្នកប្រយុទ្ធក្រុមហេសបូឡាច្រើននាក់។

ប្រភពព័ត៌មានពីសន្តិសុខ បានប្រាប់សារព័ត៌មានរ៉យទ័រថា ការវាយប្រហារដាច់ដោយឡែក របស់អ៊ីស្រាអែល ទៅលើភូមិ Aita ដែលមានចម្ងាយប្រហែល១៤គីឡូម៉ែត្រភាគខាងជើងព្រំដែនជាមួយអ៊ីស្រាអែល បានសម្លាប់អ្នកប្រយុទ្ធក្រុមហេសបូឡា និងកុមារម្នាក់។