អង្គការសុខភាពពិភពលោក បាននិយាយកាលពីថ្ងៃសុក្រ ទី២៣ ខែសីហា ថា ដៃគូនានារបស់ខ្លួន ដូចជា អង្គការ Gavi និងអង្គការ UNICEF អាចចាប់ផ្តើមទិញវ៉ាក់សាំងជំងឺអុតស្វា មុនពេលត្រូវបានអនុម័តដោយទីភ្នាក់ងារសុខភាពអង្គការសហប្រជាជាតិ ដើម្បីទទួលបានការចាក់វ៉ាក់សាំងទៅកាន់ទ្វីបអាហ្រ្វិកឲ្យបានកាន់តែលឿន ខណៈទ្វីបនេះប្រយុទ្ធប្រឆាំងការរាលដាលវីរុសកាន់តែកើនឡើង។

ជាធម្មតា អង្គការដូចជា Gavi ដែលជួយដល់ប្រទេសមានប្រាក់ចំណូលទាបក្នុងការទិញវ៉ាក់សាំង អាចចាប់ផ្តើមទិញវ៉ាក់សាំងបាន នៅពេលទទួលបានការអនុម័តពីអង្គការសុខភាពពិភពលោក។ ប៉ុន្តែវិធានការត្រូវបានបន្ធូរបន្ថយនៅក្នុងករណីនេះដើម្បីធ្វើឱ្យការពិភាក្សាក្នុងដំណើរការ ខណៈការអនុម័តរបស់អង្គការសុខភាពពិភពលោក នឹងត្រូវកំណត់ក្នុងប៉ុន្មានសប្តាហ៍ខាងមុខនេះ។

វ៉ាក់សាំងចំនួនពីរប្រភេទ ដែលផលិតដោយក្រុមហ៊ុន Bavarian Nordic របស់ប្រទេសដាណឺម៉ាក និង ក្រុមហ៊ុន KM Biologics របស់ប្រទេសជប៉ុន ត្រូវបានអនុម័តរួចហើយដោយនិយតករនៅជុំវិញពិភពលោក រួមទាំងសហរដ្ឋអាមេរិក និងប្រទេសជប៉ុន ហើយកំពុងប្រើប្រាស់យ៉ាងទូលំទូលាយសម្រាប់ ជំងឺអុតស្វា ចាប់តាំងពីឆ្នាំ២០២២។

ប្រជាជនប្រហែល ១,២ លាននាក់ បានចាក់វ៉ាក់សាំងរបស់ក្រុមហ៊ុន Bavarian Nordic នៅក្នុងសហរដ្ឋអាមេរិកតែមួយ។ អង្គការសុខភាពពិភពលោក ត្រូវបានគេរំពឹងថានឹងផ្តល់អាជ្ញាប័ណ្ណបន្ទាន់ដល់ការចាក់វ៉ាក់សាំង នៅខែកញ្ញា។

ជំងឺអុតស្វា ដែលជាវីរុសឆ្លងរាលដាលតាមរយៈទំនាក់ទំនងជិតស្និទ្ធ ហើយជាធម្មតាមានអាការៈស្រាល ប៉ុន្តែអាចបណ្តាលឲ្យស្លាប់បាន ត្រូវបានប្រកាសថាជាគ្រាអាសន្នសាធារណៈនៃការព្រួយបារម្ភ អន្តរជាតិដោយអង្គការសុខភាពពិភពលោកកាលពីសប្តាហ៍មុន បន្ទាប់ពីវីរុសបំប្លែងខ្លួនថ្មីបានរាលដាលយ៉ាងឆាប់រហ័សនៅក្នុងសាធារណរដ្ឋប្រជាធិបតេយ្យកុងហ្គោ និងហួសពីនេះ។

កាលពីដើមខែនេះ អង្គការសុខភាពពិភពលោក បានស្នើឱ្យក្រុមហ៊ុនផលិតវ៉ាក់សាំងបញ្ជូនព័ត៌មាន ដូច្នេះវាអាចពន្លឿនដំណើរការអនុម័តរបស់ខ្លួន និងផ្តល់អាជ្ញាប័ណ្ណបន្ទាន់ នៅត្រឹមពាក់កណ្តាលខែកញ្ញា។