មន្ត្រីរុស្ស៊ី បាននិយាយកាលពីថ្ងៃសុក្រថា អង្គភាពសេវាសន្តិសុខ បានបាញ់សម្លាប់អ្នកទោសបួននាក់ដែលបានចាប់ចំណាប់ខ្មាំងនៅពន្ធនាគារទោសឧក្រិដ្ឋកម្រិតធ្ងន់ក្នុងតំបន់ Volgograd។ 

ក្នុងវីដេអូដែលបង្ហោះតាមបណ្តាញអ៊ីនធឺណិត មន្ត្រីបានពណ៌នាថាពួកគេជាក្រុមសកម្មប្រយុទ្ធរដ្ឋឥស្លាម។ បុគ្គលិកពន្ធនាគារចំនួនបួននាក់ ត្រូវបានចាក់សម្លាប់នៅក្នុងការហ៊ុមព័ទ្ធ ខណៈមួយចំនួនទៀតត្រូវបានបញ្ជូនទៅមន្ទីរពេទ្យ។

អង្គភាពសេវាពន្ធនាគារសហព័ន្ធ និយាយថា បុគ្គលិកពន្ធនាគារសរុបចំនួន៨នាក់ និងទណ្ឌិត៤ នាក់ត្រូវបានចាប់ជាចំណាប់ខ្មាំង។ នៅក្នុងវីដេអូមួយ គេឃើញជនរងគ្រោះដេកនៅក្នុងថ្លុកឈាម ហើយម្នាក់ក្នុងចំណោមពួកគេត្រូវរបួសចំបំពង់ក។ 

វាពុំច្បាស់នោះទេថា តើបុរសទាំងនោះរៀបចំដោយរបៀបណាដើម្បីទទួលបានកាំបិត ឬទូរស័ព្ទដៃដែលប្រើប្រាស់សម្រាប់ថត និងបង្ហោះវីដេអូតាមអ៊ីនធឺណិត។

ប្រទេសរុស្ស៊ី បានឃើញការកើនឡើងកាលពីពេលថ្មីៗក្នុងការវាយប្រហាររបស់ក្រុមសកម្មប្រយុទ្ធអ៊ីស្លាម ដែលកំពុងចោទជាសំណួរអំពីសន្តិសុខ។

កាលពីខែមិថុនា អ្នកទោសចំនួន៦នាក់ដែលបានចាប់ចំណាប់ខ្មាំងច្រើននាក់ក្នុងអំឡុងពេលការបះបោរនៅក្នុងពន្ធនាគារ ដែលជាប់ពាក់ព័ន្ធជាមួយរដ្ឋអ៊ីស្លាមនៅក្នុងតំបន់ Rostov ត្រូវបានបាញ់សម្លាប់ ហើយកាលពីខែមីនា ក្រុមរដ្ឋអ៊ីស្លាម បានអះអាងទទួលខុសត្រូវចំពោះការវាយប្រហារមួយ ដែលខ្មាន់កាំភ្លើងបានវាយឆ្មក់ចូលសាលប្រគុំតន្ត្រី Crocus City ក្បែរទីក្រុងមូស្គូ ដោយបានសម្លាប់មនុស្សជាង ១៤០នាក់។