​បាល់ទះ​៖ សហព័ន្ធ​កីឡា​បាល់ទះ​កម្ពុជា​បាន​ប្រកាស​ឲ្យ​ដឹង​ថា កីឡាការិនី​បាល់ទះ​ខ្មែរ​នៅ​អាមេរិក Brittany Melirachana Soun បានបង្ហាញ​ពី​ការចង់​មក​ចូលរួម​ជាមួយ​ក្រុម​បាល់ទះ​ឆ្នេរ​ខ្សាច់​ជម្រើសជាតិ​កម្ពុជានៅ​ស៊ី​ហ្គេមឆ្នាំ​២០២៣។​

​តាម​ការជូនដំណឹង​ដដែល​បាន​ឲ្យ​ដឹងថា កីឡាការិនី​មាន​ឪពុកម្ដាយ​ជា​ខ្មែរ និង​កើត​លើ​ទឹកដី​អាមេរិក​រូបនេះ បាន​ស្ម័គ្រចិត្ត​ជួយ​ក្រុម​បាល់ទះ​នារី​ឆ្នេរ​ខ្សាច់​ជម្រើសជាតិ​កម្ពុជា ជាពិសេស​គឺ​ក្នុងការ​ត្រៀមខ្លួន​ពេល​កម្ពុជា​ធ្វើជា​ម្ចាស់ផ្ទះ ​ព្រឹត្តិការណ៍​កីឡា​ស៊ី​ហ្គេមលើក​ទី​៣២ នា​ឆ្នាំ​២០២៣។ ​តាម​ការបញ្ជាក់​របស់​សហព័ន្ធ បច្ចុប្បន្ន Brittany Melirachana មាន​វ័យ ១៦​ឆ្នាំ និង​កម្ពស់ ១,៨០​ម៉ែត្រដែលជា​សមាជិក​ក្រុម​បាល់ទះ​ក្នុង​សាល Varisity Campolindo High School និង​ជា​សមាជិក​ក្រុម​បាល់ទះ​ឆ្នេរ​ខ្សាច់ Kleos Beach Volleyball Club, Elite Development Program 1។​

​យុវតី​ដ៏​ស្រស់ស្អាត​រូបនេះធ្លាប់​ឈ្នះ​ពានរង្វាន់​មួយចំនួន ដូចជា​ពានរង្វាន់ 2019 California Interscholastic Federation Northern Regional Champion, Division 1, ពានរង្វាន់ 2019 California State Champion Finalist, Divison 1, ពានរង្វាន់ 2019 Campolindo High School JV Coaches Award និង​កាលពី​ថ្មីៗនាង​ទើប​ជួយ​ក្រុម​ឈ្នះ​ពានរង្វាន់ 2021 Haft Moon Bay AVP U16 Beach Volleyball Tournament Finalist។​ ​ជាមួយ​ការចង់​មក​ប្រកួត​តំណាង​ប្រទេស​កំណើត​របស់​ឪពុកម្ដាយ​ខ្លួន​នេះដែរ សហព័ន្ធ​កីឡាបាល់ទះ​កម្ពុជាក៏បាន​បើកភ្លើង​ខៀវ​ស្វាគមន៍​ដោយ​ក្ដី​រីករាយ ដោយ​សហព័ន្ធ​បើកចំហរ​ដល់​កូន​ខ្មែរដែលមាន​សមត្ថភាព​ទាំង​ក្នុង និង​ក្រៅប្រទេស​មកជួយ​ដល់​ក្រុម​ជម្រើសជាតិ មិន​ថា​បាល់ទះ​ក្នុង​សាល​ ឬបាល់ទះ​ឆ្នេរ​ខ្សាច់​នោះទេ៕

​អត្ថបទ៖ លី ឈុន​ឡា