ការផ្ទុះដ៏ខ្លាំងក្លា បានធ្វើឲ្យកក្រើកតំបន់ជនបទភាគខាងលិចនៃខេត្ត Homs របស់ប្រទេសស៊ីរី កាលពីល្ងាចថ្ងៃសុក្រ ខណៈដែលការវាយប្រហារតាមអាកាសរបស់អ៊ីស្រាអែល បានកំណត់គោលដៅទៅលើឃ្លាំងផ្ទុកប្រេងឥន្ធនៈដែលមានទំនាក់ទំនងជាមួយក្រុមហេសបូឡា។ នេះបើយោងតាមក្រុមឃ្លាំមើលសង្គ្រាម។

យោងតាមអង្គការឃ្លាំមើលសិទ្ធិមនុស្សស៊ីរីបានឲ្យដឹងថា ការវាយប្រហារនោះ ត្រូវបានគេរាយការណ៍ថាបានវាយប្រហារឃ្លាំងផ្ទុកប្រេងឥន្ធនៈ នៅជិតភូមិ Khirbet al-Tin ក្នុងច្រករបៀង Safita-Homs ភាគខាងលិចនៃរោងចក្រចម្រាញ់ប្រេងHoms ក៏ដូចជាឃ្លាំងទំនិញនៅជិតទីក្រុង Hama ផងដែរ។

ក្រុមឃ្លាំមើលបានបន្ថែមថា ការការពារដែនអាកាសរបស់ស៊ីរី បានបរាជ័យក្នុងការស្ទាក់ចាប់មីស៊ីលដែលបាញ់មក ដោយបានវាយប្រហារចំគោលដៅដែលបានគ្រោងទុក។

ស្របពេលជាមួយគ្នានោះ លោក Iyad Muhammad មេបញ្ជាការកងពលតូចពន្លត់អគ្គិភ័យ Homs បានបញ្ជាក់ប្រាប់សារព័ត៌មានគាំទ្ររដ្ឋាភិបាលស៊ីរី Al-Watan ថា មនុស្សពីរនាក់ បានរងរបួសនៅក្នុងការវាយប្រហារលើភូមិ Umm Harateen ភាគខាងលិចនៃទីក្រុង Homs និងភូមិ al-Doury ភាគខាងជើងនៃទីក្រុងនេះ។ ជនរងគ្រោះ ត្រូវបានបញ្ជូនទៅកាន់មន្ទីរពេទ្យក្នុងទីក្រុង Homs ដើម្បីព្យាបាល។

ការវាយប្រហារនេះ បានកើតឡើង ចំពេលដែលភាពតានតឹងក្នុងតំបន់កំពុងបន្ត ដោយអ៊ីស្រាអែលតែងតែកំណត់គោលដៅលើទីតាំងនានា ក្នុងប្រទេសស៊ីរីដែលមានទំនាក់ទំនងជាមួយក្រុមហេសបូឡា។