បាល់ទាត់៖ ក្រុមគិរីវង់សុខសែនជ័យនឹងត្រូវជួបក្រុមម្ចាស់ផ្ទះនគរបាលជាតិ នាវេលាម៉ោង ៣៖៣០នាទីរសៀលនេះនៅទីលាន 7NG ក្នុងជំនួបបង្គ្រប់សប្ដាហ៍ទី៩ និងជាការប្រកួតបញ្ចប់ជុំទី១ នៃលីគកំពូលកម្ពុជា ខណៈនេះជាការប្រកួតដ៏សំខាន់ដោយគិរីវង់ត្រូវការយ៉ាងហោច ១ពិន្ទុដើម្បីប្រជែងកៅអី Top-8 ពីក្រុមអាស៊ីអឺរ៉ុប។
បច្ចុប្បន្នគិរីវង់ឈរលេខ៩ និងមាន ១២ពិន្ទុចាញ់ប្រៀបក្រុមអាស៊ីអឺរ៉ុប ១ពិន្ទុ។ ប៉ុន្ដែបើផ្អែកលើប្រវត្តិជួបគ្នា ក៏ដូចជាផលសងគ្រាប់បាល់បច្ចុប្បន្នគិរីវង់កំពុងមានប្រៀបជាង ដ្បិតពួកគេបានយកឈ្នះអាស៊ីអឺរ៉ុប ៤-២ កាលពីដើមរដូវកាល។ ដូច្នេះការជាមួយនគរបាលជាតិរសៀលនេះ គិរីវង់ត្រូវការយ៉ាងហោច ១ពិន្ទុប៉ុណ្ណោះដើម្បីមានឱកាសឡើង Top-8 ខណៈអាស៊ីអឺរ៉ុបត្រូវរង់ចាំអ៊ុតលទ្ធផលព្រោះពួកគាត់បានអស់ការប្រកួតទៅហើយ។ ក្រឡេកមកកាន់ក្រុមនគរបាលជាតិវិញ បច្ចុប្បន្នពួកគេទើបរកបាន ៣ពិន្ទុប៉ុណ្ណោះពីការប្រកួតស្មើគ្នា ៣លើកក្នុងចំណោម ១១ប្រកួត ដែលធ្វើឲ្យក្រុមចាស់វស្សាក្នុងលីគនេះកំពុងឈរបាតតារាង។ ដូច្នេះដើម្បីរើបម្រាសពីតំបន់កាត់ចេញ នគរបាលជាតិក៏ទាមទារឈ្នះការប្រកួតនេះដូចគ្នា។
ដូច្នេះចាំមើលតើក្រុមលោក អ៊ុង កងយ៉ានិត អាចបង្អាក់ដំណើរក្រុមគិរីវង់មិនឲ្យឡើងវគ្គ Top-8 បានទេ បន្ទាប់ពីពួកគេត្រូវការឈ្នះដូចគ្នាបែបនេះ? សូមបញ្ជាក់ថា ការប្រកួតបញ្ចប់ជុំទី១ ថ្ងៃចុងក្រោយនារសៀលនេះគឺមាន ២គូក្រៅពីនគរបាលជាតិប៉ះគិរីវង់ ក៏មាន ១គូទៀតនឹងត្រូវប្រកួតក្នុងម៉ោងដំណាលគ្នាផងដែរ គឺជំនួបបង្គ្រប់សប្ដាហ៍ទី១២ រវាងក្រុមខេត្តព្រៃវែង និងក្រុមណាហ្គាវើលដ៏៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
