ជនប៉ាឡេស្ទីន នាំគ្នាតម្រង់ជួរ ដើម្បីទទួកយកជំនួយនៅក្រៅមជ្ឈមណ្ឌលចែកចាយជំនួយរបស់អង្គការសហប្រជាជាតិ(UN) ក្នុងទីក្រុង Jabalia ស្ថិតនៅភាគខាងជើងតំបន់ហ្កាហ្សាស្រ្ទីប ។

ជំនួយទាំងនេះ រួមមានទាំងការផ្គត់ផ្គង់ស្បៀងអាហារផ្តល់ជូនដោយកម្មវិធីស្បៀងអាហារពិភពលោក(WFP) ។

គួរឲ្យដឹងថា WFP បានបង្ខំចិត្តកាត់បន្ថយចំណែកសម្រាប់គ្រួសារនៅតំបន់ហ្កាហ្សា ដើម្បីធានាថា ជំនួយនឹងមាន សម្រាប់មនុស្សជម្លៀសខ្លួនថ្មី ។

ដោយឡែក ទីភ្នាក់ងារជំនួយ OCHA របស់ UNបាននិយាយកាលពីថ្ងៃសុក្រថា បរិមាណជំនួយដែលបានចូលក្នុងតំបន់ហ្កាហ្សាកាលពីខែកក្កដាកន្លងទៅ មានចំនួនទាបបំផុត ចាប់តាំងពីខែតុលា ឆ្នាំ ២០២៣រហូតមក ពេលដែលអ៊ីស្រាអែល បើកការវាយប្រហារតំបន់បិទច្រកប៉ាឡេស្ទីនមួយនេះ ។

បុរសជនប៉ាឡេស្ទីនម្នាក់ និយាយថា ពួកគេទទួលបានអាហារកំប៉ុង ២ប្រអប់ សម្រាប់រយៈពេល ១ខែ ប៉ុន្តែអាហារទាំងនេះ បានអស់ទៅហើយ ត្រឹមរយៈពេលមិនដល់ ១សប្តាហ៍ផង ។

ក្រសួងសុខាភិបាលប៉ាឡេស្ទីន និយាយថា យុទ្ធនាការសឹករបស់អ៊ីស្រាអែលនៅតំបន់ហ្កាហ្សា បានសម្លាប់ជនប៉ាឡេស្ទីនជាង ៤ម៉ឺននាក់ ៕