ក្រុមអាជ្ញាធរ និយាយថា ទាហាននៅលើទូកពោង បានដឹកមនុស្សទៅកាន់ទីទួលសុវត្ថិភាពនៅរដ្ឋភាគឦសាន Tripura ប្រទេសឥណ្ឌា ក្រោយភ្លៀងធ្លាក់ខ្លាំងបង្កជាទឹកជំនន់ និងបំណាក់ បង្ខំឲ្យមនុស្សជាង ៦៥.០០០នាក់ ចាកចេញពីផ្ទះសម្បែងរបស់ពួកគេ និងបានសម្លាប់មនុស្ស ២៣នាក់ ។

ក្រុមមន្រ្តីនិយាយថា មនុស្សដែលជម្លៀសខ្លួន បានស្នាក់នៅតាមជំរំបណ្តោះអាសន្នចំនួន ៤៥០កន្លែង ក្នុងនោះមនុស្សប្រហែល ១,៧លាននាក់ បានរងផលប៉ះពាល់ ជាមួយនឹងការខូចខាតហេដ្ឋារចនាសម្ព័ន្ធ ដំណាំ និងបសុសត្វទ្រង់ទ្រាយធំ ។

មន្រ្តីគ្រប់គ្រងគ្រោះមហន្តរាយដែលសុំមិនបញ្ចេញឈ្មោះ និយាយថា ភាគច្រើននៃអ្នកស្លាប់ បណ្តាលមកពីបំណាក់ដី បើទោះបីជាករណីស្លាប់ខ្លះបណ្តាលមកពីការលង់ទឹកក៏ដោយ ។

កងទ័ពឥណ្ឌា និយាយថា បុគ្គលិករបសពួកគេជាង ៨០នាក់ បានចូលរួមកិច្ចខិតខំសង្រ្គោះ ដើម្បីនាំមនុស្ស ៣៣៤នាក់ មកកាន់ទីសុវត្ថិភាព ក្រោយពួកគេជាប់ខ្លួននៅក្នុងទឹកជំនន់ ៕