​បាល់ទាត់៖ ខ្សែប្រយុទ្ធ​ជួរមុខ​របស់​ក្រុមព្រះ​ខ័ន​រាជ​ស្វាយរៀង Jean Marie Privat Befolo Mbarga បាន​បន្ដ​ឈរ​កំពូល​តារាង​កីឡាករ​ស៊ុត​បញ្ចូល​ទី​ច្រើនជាងគេ​ (Top-Scorers) បណ្ដោះអាសន្នក្រោយ​បញ្ចប់​ការប្រកួត​ជុំ​ទី​១ នៃ​លី​គ​កំពូល​កម្ពុជា ខណៈ​កីឡាករ​តាម​ពីក្រោយ ៣​រូប​រកបាន ១២​គ្រាប់​ស្មើគ្នា។​

​បច្ចុប្បន្ន​ម្ចាស់​ស្បែកជើង​មាស ២​សម័យ​ជាប់​គ្នា Privat រកបាន ១៣​គ្រាប់​ឈរ​កំពូល​តារាង Top-Scorers បន្ទាប់ពី​ខ្សែប្រយុទ្ធ​សញ្ជាតិ​កា​មេ​រ៉ូ​ន​រូបនេះរកបាន ២​គ្រាប់​បន្ថែមទៀតក្នុងជំនួប​បញ្ចប់​ជុំ​ទី​១ របស់​ក្រុម ជួយ​ឲ្យ​ក្រុម​យកឈ្នះ​ម្ចាស់ផ្ទះ​នគរបាលជាតិ ៥-០ កាលពី​ចុង​សប្ដាហ៍​កន្លងទៅ។​ ​ក្នុង​ជ័យជម្នះ​នេះ មិត្ត​រួម​ក្រុម​ដ៏​យល់ចិត្ត​របស់ Privat គឺ​កីឡាករ Mika ក៏​រកបាន ២គ្រាប់​ដែរធ្វើ​ឲ្យ​ខ្សែប្រយុទ្ធ​អេ​ស្ប៉ា​ញ​រូបនេះរកបាន ១២​គ្រាប់ស្មើ​ជាមួយ​កីឡាករ​វិសាខា Marcus Haber ដែល​រកបាន ២​គ្រាប់​ដូចគ្នាក្នុង​ជ័យជម្នះ ៥-១ លើ​ក្រុម​បឹងកេត ក៏ដូចជា​ស្នើ​គ្រាប់​បាល់​កីឡាករ​ណាហ្គា​វើ​ល​ដ៏ Marcio ដែល​ធ្វើបាន Hat-Trick ៣​គ្រាប់​ម្នាក់ឯងក្នុង​ជ័យជម្នះ ៥-២ លើ​ក្រុម​ម្ចាស់ផ្ទះ​គិរីវង់កាលពី​សប្ដាហ៍​មុន។​

​គួរ​បញ្ជាក់ថា លី​គ​កំពូល​កម្ពុជានឹង​បន្ដ​ការប្រកួត​ជុំ​ទី​២ នា​ចុង​សប្ដាហ៍​នេះ ដោយ​បែងចែក​ការប្រកួត​ជា​ពីរគឺ​ការប្រកួត ៨​ក្រុម​កំពូល​តារាងដើម្បី​ប្រជែង​ជើងឯក និង ៥​ក្រុម​បាត​តារាងដើម្បី​ស្វែងរក​ក្រុម​ត្រូវ​កាត់​ចេញពី​លី​គ​កំពូល​កម្ពុជាឆ្នាំ​២០២២។ ដូច្នេះ​សម្រាប់​កីឡាករ​បេក្ខភាព​ក្រុម Top-8 នៅសល់​ឱកាស​ស្វែងរក​គ្រាប់​បាល់​បន្ថែមប្រមាណ ៧​ប្រកួត​ទៀតនៅ​ជុំ​ទី​២ ដែល​សុទ្ធ​តែជា​ការប្រកួត​ក្រុម​ខ្លាំង​ប៉ះ​ខ្លាំង៕

​អត្ថបទ៖ លី ឈុន​ឡា