យោធារបស់ប្រទេសចិន បាននិយាយនៅថ្ងៃចន្ទ (២៦ សីហា) នេះថា ខ្លួនបានរៀបចំអង្គភាពកងទ័ពដើម្បីទៅកាន់តំបន់ យួយលី (Ruili) ជិនខាង (Zhenkang) ដែលនៅជិតសហភាពមីយ៉ាន់ម៉ា និងជួរមុខព្រំដែនផ្សេងទៀត ដើម្បីអនុវត្តការល្បាតប្រដាប់អាវុធ និងការល្បាតរួមរបស់នគរបាលជើងគោក-អាកាស ដើម្បីរក្សាសន្តិសុខ និងស្ថិរភាពនៅក្នុងតំបន់ព្រំដែន។

យោធាបាននិយាយនៅក្នុងសេចក្តីថ្លែងការណ៍មួយថា បញ្ជាការខាងត្បូងនៃកងទ័ពរំដោះប្រជាជនចិនបានរៀបចំអង្គភាពកងទ័ពដើម្បីសាកល្បងសមត្ថភាពរបស់ខ្លួនក្នុងការ «ចល័តយ៉ាងឆាប់រហ័ស ទប់ស្កាត់ និងគ្រប់គ្រង ព្រមទាំងការវាយប្រហាររួមគ្នា និងរក្សាសន្តិសុខ និងស្ថិរភាពនៅក្នុងតំបន់ព្រំដែន»។

ការល្បាតនេះធ្វើឡើងបន្ទាប់ពីរដ្ឋមន្ត្រីការបរទេសចិន លោក វ៉ាង យី (Wang Yi) បានជួបជាមួយមេដឹកនាំរបបសឹក លោក មីន អ៊ុងល៉ាំង ( Min Aung Hlaing) កាលពីពាក់កណ្តាលខែសីហា ក្នុងអំឡុងដំណើរទស្សនកិច្ចទៅកាន់រដ្ឋធានីណៃពិដោ (Naypyitaw) ជាទីដែលភាគីទាំងពីរពិភាក្សាដើម្បីរៀបចំ «ការបោះឆ្នោតមានលក្ខណៈរួមបញ្ចូល» ការផ្លាស់ប្តូរទៅលទ្ធិប្រជាធិបតេយ្យ ស្ថិរភាពក្នុងប្រទេស ក៏ដូចជាបញ្ហាព្រំដែន ខណៈការប្រយុទ្ធគ្នារវាងរបបសឹក និងក្រុមបះបោរប្រដាប់អាវុធកាន់តែខ្លាំងឡើង។

រដ្ឋាភិបាលដែលគ្រប់គ្រងដោយយោធារបស់មីយ៉ាន់ម៉ា បានប្រយុទ្ធនឹងការបះបោរនៅលើសមរភូមិមុខជាច្រើនចាប់តាំងពីការផ្តួលរំលំរដ្ឋាភិបាលជាប់ឆ្នោតក្នុងឆ្នាំ២០២១ ប៉ុន្តែការបរាជ័យនៅក្នុងតំបន់ព្រំដែនចាប់តាំងពីខែតុលា ឆ្នាំមុន បានធ្វើឱ្យខ្លួនបាត់បង់ការគ្រប់គ្រងលើទឹកដីជាច្រើនជាប់ព្រំដែនបង់ក្លាដែស ចិន និងឥណ្ឌា៕