ស្ត្រីជាច្រើននាក់ នៅតែរក្សាសម្ពាធនៅក្នុងទីក្រុង Siligury ភាគខាងកើតប្រទេសឥណ្ឌា កាលពីថ្ងៃអាទិត្យ ដែលបានចេញធ្វើបាតុកម្មដោយមានកាន់គប់ភ្លើង និងបើកភ្លើងទូរស័ព្ទដើម្បីទាមទាររកយុត្តិធម៌សម្រាប់វេជ្ជបណ្ឌិត ដែលត្រូវបានចាប់រំលោភនិងសម្លាប់ នៅទីក្រុង Kolkota កាលពីថ្ងៃទី៩ ខែសីហា។

ជនរងគ្រោះ ជាវេជ្ជបណ្ឌិតអាយុ ៣១ឆ្នាំ ត្រូវបានគេប្រទះឃើញដេកស្លាប់នៅលើពូកប្រឡាក់ដោយឈាមនៅក្នុងមហាវិទ្យាល័យវេជ្ជសាស្ត្រដែលនាងធ្វើការនៅក្នុងទីក្រុង Kolkata ។

បុគ្គលិកនៅមហាវិទ្យាល័យវេជ្ជសាស្រ្ដ R.G. Kar បានប្រាប់សារព័ត៌មានរ៉យទ័រថា វេជ្ជបណ្ឌិតរងគ្រោះងងុយដេក បន្ទាប់ពីធ្វើការជិត២០ ម៉ោងបន្ទាប់ពីធ្វើការប្តូរវេនរយៈពេល៣៦ម៉ោង។

កំហឹងចំពោះការបរាជ័យនៃច្បាប់ដ៏តឹងរ៉ឹងដើម្បីទប់ស្កាត់ការកើនឡើងអំពើហិង្សាលើស្ត្រី បានបង្កឱ្យមានការតវ៉ាដោយក្រុមវេជ្ជបណ្ឌិត និងក្រុមស្ត្រី និងបានធ្វើឲ្យមានកូដកម្មជាច្រើនថ្ងៃនៅទូទាំងប្រទេសឥណ្ឌា។ នគរបាលស្ម័គ្រចិត្តម្នាក់ ត្រូវបានចាប់ខ្លួន និងចោទប្រកាន់ពីបទឧក្រិដ្ឋ។

វេជ្ជបណ្ឌិតនៅទូទាំងប្រទេស បានធ្វើការតវ៉ា ដើរដង្ហែរក្បួនមានដុតភ្លើងទៀន និងកាន់គប់ភ្លើង ហើយបានបដិសេធមិនពិនិត្យអ្នកជំងឺដែលពុំស្ថិតក្នុងស្ថានភាពសង្គ្រោះបន្ទាន់កាលពីសប្តាហ៍មុន បន្ទាប់ពីមានការសម្លាប់វេជ្ជបណ្ឌិតហាត់ការអាយុ ៣១ ឆ្នាំ កាលពីថ្ងៃទី ៩ ខែសីហា នៅទីក្រុង Kolkata ភាគខាងកើត។