ប្រធានាធិបតីអ៊ុយក្រែន បានប្រាប់អ្នកសារព័ត៌មានឥណ្ឌានៅក្នុងបទសម្ភាសន៍មួយដែលត្រូវបានបង្ហោះនៅលើបណ្តាញទំនាក់ទំនងសង្គមរបស់លោក កាលពីថ្ងៃអាទិត្យ ថា អតីតប្រធានាធិបតីសហរដ្ឋអាមេរិក លោក ដូណាល់ ត្រាំ បានបង្ហាញសញ្ញាគាំទ្រដល់ប្រទេសអ៊ុយក្រែន ក្នុងការសន្ទនាជាមួយលោក Volodymyr Zelenskiy និងបាននិយាយថា លោកចង់ឲ្យបញ្ឈប់សង្គ្រាមជាមួយរុស្ស៊ី។

បេក្ខជនប្រធានាធិបតីមកពីគណបក្សសាធារណរដ្ឋ លោក Trump ត្រៀមខ្លួនក្នុងការប្រកួតប្រេជែងដ៏តឹងតែងជាមួយអនុប្រធានាធិបតី លោកស្រី Kamala Harris ក្នុងការបោះឆ្នោតសហរដ្ឋអាមេរិក នៅថ្ងៃទី៥ ខែវិច្ឆិកា ហើយបានគំរាមដកសហរដ្ឋអាមេរិកចេញពីសម្ព័ន្ធយោធា NATO និងបាននិយាយថា លោកនឹងមិនការពារសម្ព័ន្ធមិត្ត ដែលមិនបង្កើនថវិកាការពារជាតិរបស់ពួកគេឡើយ។

ប្រធានាធិបតីអ៊ុយក្រែន បាននិយាយថា លោកបានប្រាប់នាយករដ្ឋមន្ត្រីឥណ្ឌា លោក Narendra Modi ថាលោកនឹងគាំទ្រឥណ្ឌា ធ្វើជាម្ចាស់ផ្ទះកិច្ចប្រជុំកំពូលលើកទីពីរស្តីពីសន្តិភាព។

អ៊ុយក្រែន បាននិយាយដដែលៗថា ខ្លួនចង់ឲ្យសង្រ្គាមបញ្ចប់ ប៉ុន្តែតាមលក្ខខណ្ឌរបស់ទីក្រុងគីវ មិនមែនតាមលក្ខខណ្ឌរបស់រុស្ស៊ីទេ។

អ៊ុយក្រែន បាននឹងកំពុងជំរុញឱ្យរៀបចំកិច្ចប្រជុំកំពូលអន្តរជាតិលើកទីពីរនៅចុងឆ្នាំនេះ ដើម្បីជំរុញចក្ខុវិស័យសន្តិភាពរបស់ខ្លួន និងការចូលរួមពីតំណាងមកពីប្រទេសរុស្ស៊ី។