ព្យុះទីហ្វុង Shanshan ត្រូវបានគេរំពឹងថានឹងខិតដល់តំបន់ភាគខាងលិចប្រទេសជប៉ុន និងតំបន់ Amami នៅភាគខាងត្បូងចាប់ពីថ្ងៃអង្គារស្អែកនេះ។ ព្យុះនេះ នឹងអាចនាំមកនូវខ្យល់បោកបក់ ព្រមទាំងភ្លៀងធ្លាក់ខ្លាំង នៅតំបន់ដ៏ធំទូលាយជាច្រើន តាមបណ្តោយមហាសមុទ្រប៉ាស៊ីហ្វិក។

ទីភ្នាក់ងារឧតុនិយម និយាយថា ព្យុះទីហ្វុងដ៏ខ្លាំងនេះ កំពុងធ្វើដំណើរលើផ្ទៃទឹក ភាគខាងត្បូងប្រទេសជប៉ុន ក្នុងល្បឿន២៥គីឡូម៉ែត្រក្នុងមួយម៉ោង គិតត្រឹមម៉ោង៣ទៀបភ្លឺ នៅថ្ងៃចន្ទនេះ ម៉ោងក្នុងតំបន់។ ព្យុះទីហ្វុង Shanshan កំពុងនាំយកល្បឿនខ្យល់អតិបរិមា ១២៦ គីឡូម៉ែត្រក្នុងមួយម៉ោង នៅជិតចំណុចកណ្តាលរបស់វា និងមានសន្ទុះខ្យល់ខ្លាំងដល់ទៅ ១៨០ គីឡូម៉ែត្រក្នុងមួយម៉ោង។

ព្យុះទីហ្វុង Shanshan ត្រូវបានគេរំពឹងថានឹងបន្តឆ្ពោះទៅភាគខាងជើង ខណៈបង្កើនកម្លាំង មុនពេលចូលទៅdដល់ភាគខាងលិចប្រទេសជប៉ុន និងតំបន់កោះ Amami ក្នុងខេត្ត Kagoshima។

ទីភ្នាក់ងារឧតុនិយម និយាយថា ខ្យល់អាចនឹងកាន់តែខ្លាំងនៅថ្ងៃពុធ ដោយព្យាករណ៍ថា ល្បឿនខ្យល់អតិបរមានឹងឈានដល់១៦២ គីឡូម៉ែត្រក្នុងមួយម៉ោងនៅភាគខាងត្បូង កោះ Kyushu និងកោះ Amami និង៩០ គីឡូម៉ែត្រក្នុងមួយម៉ោងនៅក្នុងតំបន់កោះ Shikoku ។

មន្ត្រីនិយាយថា ភ្លៀងអាចនឹងធ្លាក់បន្ថែមទៀត ខណៈព្យុះកំពុងបក់ឆ្ពោះយឺតៗ។ សមុទ្រ ត្រូវបានគេរំពឹងថានឹងមានរលកខ្លាំង និងកម្ពស់ទឹកឡើង។

មន្ត្រីទីភ្នាក់ងារកំពុងជំរុញឱ្យមានការប្រុងប្រយ័ត្នខ្ពស់ចំពោះខ្យល់បក់បោកខ្លាំង បំណាក់ដី ការជន់លិចនៅតំបន់ទំនាប កម្ពស់ទឹកកើនឡើង និងការជន់លិចទន្លេនានា ព្រមទាំងរលកខ្ពស់ៗ។