ភ្នំពេញ៖ យុទ្ធនាការបាញ់ថ្នាំសម្លាប់សត្វមូស នៅតាមសង្កាត់ទាំង ១០៥ នៅក្នុង​មូលដ្ឋាន​ខណ្ឌ​ទាំង១៤ ក្នុងរាជធានីភ្នំពេញបានឈានដល់ការបិទបញ្ចប់ហើយ នាយប់ថ្ងៃទី២៥ ខែសីហា ឆ្នាំ​២០២៤​។ នេះបើតាមលោកវេជ្ជបណ្ឌិត ងី មានហេង ប្រធានមន្ទីរ​សុខាភិបាល​រាជ​ធានី​ភ្នំពេញ​បាន​ឱ្យ​ដឹងនៅថ្ងៃ២៦ ខែសីហា ឆ្នាំ២០២៤នេះ។

លោកវេជ្ជបណ្ឌិត ងី មានហេង បានឱ្យដឹងថា យុទ្ធនាការបាញ់មូស ដែលរដ្ឋបាលរាជធានីភ្នំពេញ សហការជាមួយក្រុមការងារកងពលតូច ង៧០ ចុះបាញ់ថ្នាំមូសនៅតាមភូមិ សង្កាត់ និងតាម​សហគមន៍​ដែលបានចាប់ផ្ដើមកាលពីថ្ងៃទី១៧ ខែសីហា បានបញ្ចប់រួចរាល់​ទាំង​ស្រុង​ហើយ​ត្រឹម​យប់​ថ្ងៃទី​២៥ ខែសីហានេះ។ ដែលកិច្ចការនេះមានការយកចិត្តទុកដាក់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានគិតគូរយ៉ាងខ្លាំងពីសុខទុក្ខ និងសុខមាលភាពប្រជាពលរដ្ឋ និង​ដោយមានការចង្អុលបង្ហាញពី ឯកឧត្តម ឃួង ស្រេង អភិបាល​នៃ​គណៈ​អភិបាល​រាជ​ធានី​ភ្នំពេញ បានចាត់ចែងឱ្យមន្ទីរសុខាភិបាលរាជធានីភ្នំពេញ និងការិយាល័យ​សុខាភិបាល​ស្រុក​ប្រតិបត្តិ​ទាំង​៧ សហការជាមួយ ក្រុមការងារកងពលតូច ង៧០ ចុះធ្វើសកម្មភាព​បាញ់​ថ្នាំ​សម្លាប់​សត្វ​មូស​ទាំងថ្ងៃ ទាំងយប់នៅក្នុងមូលដ្ឋានសង្កាត់ទាំង១០៥ក្នុងខណ្ឌទាំង១៤ និងតាម​សហគមន៍​នានា ហើយដោយមានការចូលរួមបង្ករលក្ខណៈងាយស្រួលពីអាជ្ញាធរខណ្ឌ និង​សង្កាត់​ទាំងអស់ធ្វើឱ្យដំណើរបាញ់ថ្នាំមូសទទួលបានលទ្ធផលល្អរួចមុនផែនការ។

សូមជម្រាបជូនថា កាលពីល្ងាចថ្ងៃ២៣ ខែសីហា ឯកឧត្តម ឃួង ស្រេង អភិបាលរាជធានីភ្នំពេញ បានណែនាំបន្ថែមឱ្យប្រធានមន្ទីរសុខាភិបាលរាជធានីភ្នំពេញប្រើប្រាស់រថយន្តដឹកម៉ាស៊ីនបាញ់ថ្នាំសម្លាប់​មូសខ្នាតធំ បន្តចុះបាញ់ថ្នាំសម្លាប់មូសខ្លានៅតំបន់និងទីតាំងសំខាន់ៗ ជាច្រើន​កន្លែង​បន្ថែម​ទៀត ពិសេសនៅភាគខាងជើងភូមិសាស្ត្ររាជធានីភ្នំពេញ ដែលមានដូចជា នៅតំបន់​អគ្គិសនី​កម្ពុជា​បឹងកក់ ស្ថិតក្នុងខណ្ឌទួលគោក ប្រឡាយអូបាក់ទូក ប្រឡាយអូរវែង ប្រឡាយ​១៩២៨ ដល់ទំនប់កប់ស្រូវ តំបន់សាកលវិទ្យាល័យអេស៊ីលីដា តំបន់រថយន្ត​ពន្លត់​អគ្គិភ័យ​នៃ​ស្នង​ការ​នគរបាលរាជធានី ក្នុងខណ្ឌឬស្សីកែវ ប្រឡាយទួលសំពៅ និងប្រឡាយអូរអាកុជ នៅ​ខណ្ឌសែនសុខជាដើម៕ អត្ថបទ៖ ប្រាក់ វ៉ាន់ដា