រយៈពេលជាច្រើនសប្តាហ៍មកហើយ អ៊ីស្រាអែលបានរង់ចាំដោយក្តីភ័យខ្លាច និងបារម្ភយ៉ាងខ្លាំង ចំពោះការវាយប្រហារដ៏ធំពីសំណាក់ក្រុមហេសបូឡា ដែលជាការសងសឹក ចំពោះការធ្វើឃាតរបស់អ៊ីស្រាអែលទៅលើមេបញ្ជាការជាន់ខ្ពស់នៃក្រុមឧទ្ទាម នៅប្រទេសលីបង់មួយនេះ ក្នុងទីក្រុងបេរូត កាលពីខែកក្កដា ចំពេលមានការភ័យខ្លាចថា ការកើនឡើងនូវភាពតានតឹងឆ្លងព្រំដែននេះ អាចរាលដាលទៅជាសង្រ្គាមពេញទាំងតំបន់ទាំងមូល។

ប៉ុន្តែប្រជាជនអ៊ីស្រាអែលភាគច្រើន កាលពីថ្ងៃអាទិត្យ (ទី២៥ ខែសីហា) បានចាប់ផ្ដើមថ្ងៃថ្មីជាមួយនឹងការដឹងថា យ៉ាងហោចណាស់ សម្រាប់រយៈពេលភ្លាមៗនេះ ការវាយប្រហារដ៏គួរឲ្យភ័យខ្លាចនេះ ហាក់ដូចជាស្ទើរតែបានបញ្ចប់ មុនពេលវាចាប់ផ្តើមទៅទៀត។ អ៊ីស្រាអែល និងក្រុមហេសបូឡា ភ្លាមៗ បានអះអាងប្រភេទនូវជ័យជម្នះ ដោយអ៊ីស្រាអែលលើកឡើងពីការវាយប្រហារពេលព្រឹកព្រលឹមរបស់ខ្លួនប្រឆាំងនឹងអ្វីដែលយោធាបាននិយាយថា គឺជាជើងទម្របាញ់គ្រាប់រ៉ូក្កែតរាប់ពាន់គ្រាប់របស់ក្រុមហេសបូឡា នៅភាគខាងត្បូងលីបង់ ហើយក្រុមហេសបូឡាបញ្ជាក់ពីការបាញ់គ្រាប់រ៉ូក្កែត និងយានដ្រូនជាបន្តបន្ទាប់របស់ខ្លួន នៅភាគខាងជើងអ៊ីស្រាអែល ដែលយោធាអ៊ីស្រាអែលបានប្រាប់ថា បានសម្លាប់មន្ត្រីកងទ័ពជើងទឹកម្នាក់។

តែនៅវេលាម៉ោងអាហារនាពេលព្រឹក ភាគីទាំង២ កំពុងចាប់ផ្ដើមប្រើប្រាស់ភាសានៃការទប់ស្កាត់។ ក្រុមហេសបូឡាបានប្រកាសថា ខ្លួនបានបញ្ចប់ «ដំណាក់កាលដំបូង» នៃការវាយប្រហាររបស់ខ្លួន ដើម្បីសងសឹក ចំពោះការធ្វើឃាតរបស់មេបញ្ជាការជាន់ខ្ពស់ លោក Fouad Shukur ហើយហាក់ដូចជាកំពុងប្រកាសពីការផ្អាក យ៉ាងហោចណាស់ ក៏សម្រាប់ពេលនេះដែរ។ រដ្ឋមន្ត្រីការពារជាតិអ៊ីស្រាអែល លោក Yoav Gallant បាននិយាយថា លោកបាននិយាយជាមួយរដ្ឋមន្ត្រីការពារជាតិអាមេរិក លោក Lloyd Austin ហើយពួកគេបាន «ពិភាក្សាអំពីសារៈសំខាន់នៃការបញ្ចៀសកុំឲ្យភាពតានតឹងក្នុងតំបន់កើនឡើង»។ នេះបើយោងតាមសេចក្តីថ្លែងការណ៍ពីការិយាល័យរបស់លោក Gallant។

រីឯមេដឹកនាំក្រុមហេសបូឡា លោក Hassan Nasrallah បាននិយាយនៅក្នុងសុន្ទរកថាមួយកាលពីល្ងាចថ្ងៃទី២៥ ខែសីហាថា ក្រុមរបស់លោកបានវាយប្រហារមូលដ្ឋានចារកម្មអ៊ីស្រាអែល Glilot ស្ថិតនៅភាគខាងជើងនៃទីក្រុង Tel Aviv។ លោកបានបន្តថា ប្រសិនបើការវាយប្រហារលើមូលដ្ឋាននោះទទួលបានលទ្ធផលជាទីពេញចិត្តនោះ កងជីវពលនឹងផ្អាកសកម្មភាពរបស់ខ្លួន។ លោកបានបន្ថែមថា ប្រសិនបើមិនទទួលផលដូចបំណងទេនោះ ក្រុមហេសបូឡា រក្សាសិទ្ធិឆ្លើយតបពេលក្រោយ។

យ៉ាងណាក៏ដោយចុះ បន្ទាប់ពីពីមានការវាយប្រហារនេះ តំបន់មជ្ឈិមបូព៌ានៅតែស្ថិតក្នុងភាពមិនច្បាស់លាស់ថា តើប៉ុន្មានថ្ងៃខាងមុខនឹងមានអ្វីកើតឡើង។ ក្នុងសុន្ទរកថា នៅពេលចាប់ផ្តើមកិច្ចប្រជុំរដ្ឋាភិបាល នារសៀលថ្ងៃទី២៥ ខែសីហា នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រកាសថា ព្រឹត្តិការណ៍នៅព្រឹកនេះ មិនមែនជាការបញ្ចប់នូវសាច់រឿងនោះទេ ប៉ុន្តែនៅពេលនេះ ជីវិតប្រចាំថ្ងៃ នៅអ៊ីស្រាអែល ដោយភាគច្រើន បានវិលទៅរកភាពប្រក្រតីឡើងវិញហើយ៕