​អង់គ្លេស៖ រដ្ឋមន្ត្រី​ទទួលបន្ទុក​វ៉ាក់សាំង​របស់​ប្រទេស​អង់គ្លេស បាន​និយាយ​ការពារ​ការសម្រេចរបស់រដ្ឋាភិបាល​ក្នុង​ការ​ផ្តល់​វ៉ាក់សាំង​ការពារ​វីរុស COVID-19 ដល់​កុមារ​អាយុ ១២​ឆ្នាំ​ឡើង​ទៅ ដោយ​និយាយ​ថា ​ប្រទេស​អង់គ្លេស​មានការ​ណែនាំ​ពី​គ្លីនិក​ល្អ​បំផុត​នៅលើ​ពិភព​លោក​។

ចក្រភព​អង់គ្លេស​បានសម្រេច​កាល​ពី​ថ្ងៃ​ចន្ទ ដើម្បី​ធ្វើតាម​ប្រទេស​ដទៃ​ទៀត ខណៈ​រដ្ឋាភិ​បាល​បាន​ពង្រីក​វិធាន​ការ​ចាក់​វ៉ាក់សាំង ដែល​អាច​បញ្ចៀស​តម្រូវ​ការ​បិទ​ខ្ទប់​ប្រទេស​នៅ​រដូវរងា​។ រដ្ឋមន្ត្រី​ទទួលបន្ទុក​វ៉ាក់សាំង លោក Nadhim Zahawi បាន​និយាយ​ថា រដ្ឋាភិបាល​បាន​ទទួល​យក​​ការ​បង្គាប់ ហើយ​នឹង​ចាប់ផ្ដើម​ចាក់​វ៉ាក់សាំង​នៅ​សប្តាហ៍​ក្រោយ​។ ការ​ចាក់​វ៉ាក់សាំង​សម្រាប់​​កុមារ និង​ការ​ចាក់​វ៉ាក់សាំង​ដូ​ស​ទី​៣ ឬ​ដូ​ស​ជំរុញសម្រាប់​មនុស្ស​ពេញវ័យ​ដែល​មាន​ហានិភ័យ គឺជា​ផ្នែក​មួយ​នៃ​ឧបករណ៍ការពារដើម្បីគ្រប់គ្រង​ការឆ្លងវីរុស COVID-19 នៅ​រដូវ​ស្លឹកឈើ​ជ្រុះ​និង​រដូវរងា​នេះ ដែល​នាយក​រដ្ឋមន្ត្រីលោក Boris Johnson ប្រកាស​កាលពី​ថ្ងៃ​អង្គារនៅក្នុង​សន្និសីទ​សារព័ត៌មាន​។

ការឆ្លើយ​សំណួរ​អំពី​ភាពយុត្តិធម៌​នៃ​ការចាក់​វ៉ាក់សាំង​ដូ​ស​ជំរុញ នៅពេល​ប្រៀបធៀបទៅនឹង​កង្វះ​វ៉ាក់សាំង​នៅក្នុង​ប្រទេស​ដទៃទៀត លោក Zahawi និយាយថា ចក្រភព​អង់គ្លេ​សបានផ្តល់​ជំនួយ​ចំនួន ៩លាន​ដូ​ស​ក្នុងចំណោម ១០០លាន​ដូ​ស ដែល​ចក្រភពអង់គ្លេសគ្រោង​នឹង​ផ្តល់​តាមរយៈ​កម្មវិធី​យន្តការ COVAX​។ បច្ចុប្បន្ន​ចក្រភព​អង់គ្លេសកំពុងចាក់​វ៉ាក់សាំង​ដល់មនុស្សដែលមាន​អាយុ​ចាប់ពី ១៦ឆ្នាំ​ឡើងទៅ​ស្ទើរតែ ៩០% នៃអ្នក​ដែលមាន​សិទ្ធិ​ទទួលបានវ៉ាក់សាំងយ៉ាងហោចណាស់​ដូ​ស​ទី​១​។ ចក្រភព​អង់គ្លេសមានករណី​ឆ្លង​វីរុស COVID-19 សរុប ៧,២៨២,៨១០ករណី និង​មាន​អ្នកស្លាប់ ១៣៤​,៤៤៦នាក់​៕​

អត្ថបទ៖ ប៊ុនថន