រដ្ឋមន្ត្រីការពារជាតិហ្វីលីពីន លោក Gilberto Teodoro នៅថ្ងៃចន្ទ (ទី២៦ ខែសីហា) នេះ បាននិយាយថា សកម្មភាពរបស់ចិន នៅសមុទ្រចិនខាងត្បូង គឺ «ខុសច្បាប់ច្បាស់ណាស់» ដោយការលើកឡើងនេះកើតមានឡើងបន្ទាប់ពីមានការប៉ះទង្គិចគ្នាក្នុងដែនទឹកមានជម្លោះ កាលពីថ្ងៃអាទិត្យ (ទី២៥ ខែសីហា) ជុំវិញអ្វីដែលទីក្រុងម៉ានីល បាននិយាយថា ជាបេសកកម្មផ្ដល់សម្ភារផ្គត់ផ្គង់ដល់អ្នកនេសាទ។

លោក Teodoro បានប្រាប់អ្នកសារព័ត៌មានថា៖ «យើងត្រូវតែរំពឹងមាននូវអាកប្បកិរិយាបែបនេះពីប្រទេសចិន ព្រោះនេះជាការប៉ះទង្គិចគ្នា។ យើងត្រូវតែត្រៀមខ្លួនរួចជាស្រេច ដើម្បីទទួល និងស៊ាំទៅនឹងសកម្មភាពប្រភេទទាំងនេះរបស់ប្រទេសចិន ដែលច្បាស់ណាស់ គឺជាខុសច្បាប់ ដូចដែលយើងបាននិយាយម្តងហើយម្តងទៀតជាច្រើនដងមកហើយ»។

គួរបញ្ជាក់ថា កងកំលាំងកិច្ចការសមុទ្រចិនខាងត្បូងរបស់ទីក្រុងម៉ានីល បានចោទប្រកាន់នាវាចិនថា បានរំលោភបំពាន និងប្រើប្រាស់កាណុងបាញ់ទឹក នៅជិតតំបន់ថ្មប៉ប្រះទឹក Sabina ប្រឆាំងនឹងនាវានេសាទហ្វីលីពីន ដែលដឹកជញ្ជូនអាហារ ប្រេងឥន្ធនៈ និងថ្នាំពេទ្យ សម្រាប់អ្នកនេសាទហ្វីលីពីន។

ចំណែកឆ្មាំល្បាតសមុទ្រចិន បាននិយាយថា នាវាហ្វីលីពីន «មិនអើពើនឹងការព្រមានធ្ងន់ធ្ងរម្តងហើយម្តងទៀត ហើយបានបើកចូលទៅជិតដោយចេតនា និងបានបុក» ទូកអនុវត្តច្បាប់របស់ប្រទេសចិន ទើបបណ្តាលឲ្យមានការប៉ះទង្គិចគ្នានោះ។

ការប៉ះទង្គិចគ្នាកាលពីថ្ងៃទី២៥ ខែសីហានោះ បានក្លាយជាស្រមោលបាំងដល់កិច្ចខិតខំប្រឹងប្រែង ក្នុងការកសាងទំនុកចិត្តឡើងវិញ និងដោះស្រាយជម្លោះ នៅសមុទ្រចិនខាងត្បូងឲ្យកាន់តែប្រសើរឡើង បន្ទាប់ពីមានការប្រឈមមុខដាក់គ្នាម្ដងហើយម្ដងទៀតរយៈពេលជាច្រើនខែមក៕