ប្រធានាធិបតីទុយនីស៊ី លោក Kais Saied កាលពីថ្ងៃអាទិត្យ (ទី២៥ ខែសីហា) បានប្រកាសអំពីការរុះរើគណៈរដ្ឋមន្ត្រីយ៉ាងទូលំទូលាយនៃរដ្ឋមន្ត្រីចំនួន ១៩រូប ដែលរួមបញ្ចូលទាំងរដ្ឋមន្ត្រីការពារជាតិ កិច្ចការបរទេស និងសេដ្ឋកិច្ច នៅមុនការបោះឆ្នោតប្រធានាធិបតី នាថ្ងៃទី៦ ខែតុលា។

លោកប្រធានាធិបតី បានឲ្យដឹងនៅក្នុងសេចក្តីថ្លែងការណ៍មួយថា លោក Khaled Shili នឹងក្លាយជារដ្ឋមន្ត្រីការពារជាតិថ្មី ហើយលោក Mohamed Ali Nafti ជារដ្ឋមន្ត្រីក្រសួងការបរទេស។ លោក Saied កាលពីដើមខែនេះ បានបញ្ចប់តំណែងនាយករដ្ឋមន្ត្រី លោក Ahmed Hachani ដោយជំនួសមកវិញដោយលោក Kamel Maddouri ដែលជារដ្ឋមន្ត្រីសង្គមកិច្ច។

រដ្ឋមន្ត្រីក្រសួងហិរញ្ញវត្ថុ យុត្តិធម៌ និងមហាផ្ទៃ បានបន្តតួនាទីរបស់ខ្លួនដដែល។ ការរុះរើគណៈរដ្ឋមន្ត្រីកើតឡើងចំពេលមានវិបត្តិហិរញ្ញវត្ថុ និងការមិនសប្បាយចិត្តគ្រប់ទីកន្លែង ជុំវិញការដាច់ទឹក និងអគ្គិសនីជាថ្មី នៅក្នុងផ្នែកជាច្រើនរបស់ប្រទេស ហើយនិងកង្វះខាតទំនិញ និងថ្នាំពេទ្យមួយចំនួន ដោយចំណាត់ការនេះ ទំនងជាធ្វើឡើង ក្នុងគោលបំណងដាក់បញ្ចូលសមាជិកថ្មី និងទាក់ទាញអ្នកបោះឆ្នោត។

គួរបញ្ជាក់ថា លោក Saied ដែលបានពង្រឹងការគ្រប់គ្រងអំណាច នៅឆ្នាំ២០២១ បន្ទាប់ពីរូបលោកបានរំលាយសភាជាប់ឆ្នោត កំពុងឈរឈ្មោះស្វែងរកការជាប់ឆ្នោតឡើងវិញ ដោយត្រូវប្រជែងនឹងបេក្ខជន ២នាក់ផ្សេងទៀត៕