រដ្ឋមន្ត្រីការបរទេសអ៊ីរ៉ង លោក Abbas Araqchi បានប្រាប់សមភាគីអ៊ីតាលីលោក Antonio Tajani ថា ប្រទេសរបស់លោកមិនប្រឹងប្រែងបង្កើនភាពតានតឹង នៅតំបន់មជ្ឈិមបូព៌ានោះទេ ដោយលោកបន្ថែមថា ការឆ្លើយតបរបស់ខ្លួន ចំពោះការសម្លាប់ប្រមុខក្រុមហាម៉ាស នៅទីក្រុងតេអេរ៉ង់ នឹងត្រូវធ្វើឡើងដោយ «ភាពច្បាស់លាស់ និងគិតគូរយ៉ាងល្អិតល្អន់»។

គួរបញ្ជាក់ថា អ៊ីរ៉ង់បានដាក់ការទទួលខុសត្រូវទៅលើអ៊ីស្រាអែល ចំពោះការធ្វើឃាតលើមេដឹកនាំក្រុមហាម៉ាស លោក Ismail Haniyeh កាលពីថ្ងៃទី៣១ ខែកក្កដា ដោយលោក Araqchi ដែលត្រូវបានប្រព័ន្ធផ្សព្វផ្សាយរដ្ឋរបស់អ៊ីរ៉ង់ដកស្រង់សម្ដី បាននិយាយថា នោះគឺជា «ការរំលោភដែលមិនអាចលើកលែងបាន ចំពោះសន្តិសុខ និងអធិបតេយ្យភាពរបស់អ៊ីរ៉ង់»។ តែអ៊ីស្រាអែលទាំងមិនបានអះអាង ឬក៏បដិសេធ សម្រាប់ការទទួលខុសត្រូវ ចំពោះការស្លាប់របស់លោក Haniyeh នៅក្នុងរដ្ឋធានីអ៊ីរ៉ង់នោះឡើយ។

បើយោងតាមសេចក្តីថ្លែងការណ៍អំពីការសន្ទនាតាមទូរសព្ទ ដែលត្រូវបានចេញផ្សាយ នៅថ្ងៃចន្ទ (ទី២៦ ខែសីហា) នេះ ដោយក្រសួងការបរទេសអ៊ីរ៉ង់ បានឲ្យដឹងថា លោក Araqchi បានប្រាប់សមភាគីអ៊ីតាលីថា៖ «អ៊ីរ៉ង់មិនប្រឹងប្រែងបង្កើនភាពតានតឹងនោះទេ។ តែវាមិនមែនជាបញ្ហាខ្លាចរអានោះឡើយ»។

លោក Araqchi បានសង្កត់ធ្ងន់ថា ការឆ្លើយតបរបស់អ៊ីរ៉ង់ នឹងមាន «ភាពច្បាស់លាស់ ការគិតទុកជាមុន និងភាពត្រឹមត្រូវ»។ នេះបើយោងតាមសេចក្តីថ្លែងការណ៍នោះ៕