អ៊ីរ៉ង់ នៅថ្ងៃចន្ទ (ទី២៦ ខែសីហា) នេះ បាននិយាយថា អ៊ីស្រាអែលបានបាត់បង់នូវសមត្ថភាពដ៏ខ្លាំងក្លារបស់ខ្លួន ក្នុងការទប់ស្កាត់ការវាយប្រហារពីសត្រូវ ហើយថា លំនឹងផ្នែកយុទ្ធសាស្ត្រ នៅក្នុងតំបន់ បានប្រែប្រួលលែងមានអំណោយផលដល់ប្រទេសនេះទៀតហើយ បន្ទាប់ពីមានការវាយប្រហារដោយក្រុមប្រដាប់អាវុធលីបង់ គឺក្រុមហេសបូឡា។

គួរបញ្ជាក់ថា ក្រុមហេសបូឡាបានបាញ់រ៉ូក្កែត និងបង្ហោះយានដ្រូនរាប់រយចូលទៅអ៊ីស្រាអែល កាលពីព្រឹកព្រលឹមថ្ងៃអាទិត្យ (ទី២៥ ខែសីហា) បើទោះបីជាយោធាអ៊ីស្រាអែល បាននិយាយថា ខ្លួនបានវាយប្រហារលីបង់ ដោយប្រើប្រាស់យានដ្រូនប្រហែល ១០០គ្រឿង ដើម្បីរារាំងការវាយប្រហារដ៏ធំជាងនេះក៏ដោយ ដែលនេះជាការប៉ះទង្គិចដ៏ធំបំផុតមួយ អំឡុងពេលមានសង្គ្រាមឆ្លងព្រំដែនជាង ១០ខែមកនេះ។

នៅលើវេទិកាបណ្ដាញសង្គម X អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បានសរសេរថា៖ «ទោះបីជាមានការគាំទ្រយ៉ាងទូលំទូលាយពីរដ្ឋនានា ដូចជាសហរដ្ឋអាមេរិកក៏ដោយ ក៏អ៊ីស្រាអែល មិនអាចទស្សន៍ទាយពីពេលវេលា និងទីកន្លែងនៃការឆ្លើយតបដែលមានការកំណត់ និងគ្រប់គ្រងយ៉ាងច្បាស់លាស់ពីក្រុមតស៊ូប្រដាប់អាវុធបានដែរ។ អ៊ីស្រាអែលបានបាត់បង់សមត្ថភាពការពាររបស់ពួកគេហើយ»។

លោក Kanaani បានបន្ថែមថា អ៊ីស្រាអែល «ឥឡូវនេះត្រូវតែការពារខ្លួនឯង នៅក្នុងដែនដីដែលស្ថិតក្រោមការកាន់កាប់របស់ខ្លួន» ហើយថា «លំនឹងផ្នែកយុទ្ធសាស្ត្របានឆ្លងកាត់ការប្រែប្រួលដ៏សំខាន់» ដែលបង្ហាញនូវការខូចខាតរបស់អ៊ីស្រាអែល។

ដោយមានការស្លាប់មនុស្ស ៣នាក់ ត្រូវបានបញ្ជាក់ នៅក្នុងប្រទេសលីបង់ និងម្នាក់ នៅអ៊ីស្រាអែល បន្ទាប់ពីការវាយប្រហារគ្នាទៅវិញទៅមក កាលថ្ងៃទី២៥ ខែសីហា ភាគីទាំង២ បានគូសបញ្ជាក់ថា ពួកគេរីករាយក្នុងការបញ្ចៀសកុំឲ្យភាពតានតឹងកើនឡើងបន្ថែមទៀត សម្រាប់ពេលនេះ ប៉ុន្តែបានព្រមានថា អាចមានការវាយប្រហារគ្នាបន្ថែមទៀត នាពេលខាងមុខ៕