ក្រុមទាហានស៊ីឈ្នួល Wagner របស់ប្រទេសរុស្ស៊ី នៅថ្ងៃចន្ទ (ទី២៦ ខែសីហា) នេះ បាននិយាយថា ខ្លួនប្រតិបត្តិការតែនៅទ្វីបអាហ្រ្វិក និងក្នុងប្រទេសសម្ព័ន្ធមិត្តរបស់រុស្ស៊ី គឺបេឡារុសប៉ុណ្ណោះ ហើយទាហានរបស់ខ្លួន លែងមានប្រយុទ្ធក្នុងសង្គ្រាមអ៊ុយក្រែនទៀតហើយ។

អ៊ុយក្រែន កាលពីថ្ងៃអាទិត្យ (ទី២៥ ខែសីហា) បានអំពាវនាវឲ្យបេឡារុសដកនូវអ្វីដែលខ្លួនបានពិពណ៌នាថា ជាកងកម្លាំងសំខាន់ៗដែលត្រូវបានដាក់ពង្រាយ នៅតាមព្រំដែនរួមគ្នារបស់ពួកគេ។ ប្រទេសនេះបាននិយាយថា ទាំងនេះរួមមានទាំងកងកម្លាំងពិសេសរបស់បេឡារុស និងអតីតទាហានស៊ីឈ្នួលរបស់ក្រុម Wagner ផងដែរ។

នៅក្នុងសេចក្តីថ្លែងការណ៍ដ៏កម្រមួយ ក្រុម Wagner បានប្រាប់ឲ្យដឹងថា បុគ្គលិករបស់ខ្លួនធ្វើការតែនៅក្នុងទ្វីបអាហ្វ្រិក និងក្នុងប្រទេសបេឡារុសប៉ុណ្ណោះ។ ក្រុមនេះបានបញ្ជាក់ថា៖ «មិនមានការបែងចែកកម្លាំងរបស់ក្រុមហ៊ុនបញ្ចូលទៅក្នុងឆ្មាំជាតិរុស្ស៊ី នៅក្នុងជួរនៃក្រសួងការពារជាតិរុស្ស៊ី ឬកន្លែងផ្សេងទៀតនោះឡើយ»។

ដោយប្រើពាក្យគាំទ្រដល់វិមានក្រឹមឡាំង សម្រាប់សង្គ្រាមនៅអ៊ុយក្រែន ក្រុមនេះ បានប្រាប់ថា ក្រុម Wagner «មិនចូលរួមក្នុងប្រតិបត្តិការយោធាពិសេស នៅដំណាក់កាលនេះទេ»។ ពាក់ព័ន្ធនឹងការអះអាងនេះ សារព័ត៌មាន Reuters មិនអាចផ្ទៀងផ្ទាត់បានឡើយ។ តែយ៉ាងណាក្ដី ក្រុម Wagner បានសង្កត់ធ្ងន់ថា៖ «ក្នុងករណីមានការផ្លាស់ប្តូរស្ថានភាព ក្រុមហ៊ុននឹងធ្វើការប្រកាសឲ្យដឹង»។

តួនាទីរបស់ក្រុមទាហានស៊ីឈ្នួល Wagner នៅក្នុងទ្វីបអាហ្រ្វិក ដែលមានដូចជាជួយគាំទ្ររបបយោធានៅក្នុងប្រទេសម៉ាលីនោះ គឺជាប្រភពនៃការព្រួយបារម្ភ ចំពោះលោកខាងលិច៕