នាយករដ្ឋមន្ត្រីឥណ្ឌា លោក ណារិនដ្រា ម៉ូឌី(Narendra Modi) កាលពីថ្ងៃចន្ទ បានសន្ទនាតាមទូរស័ព្ទជាមួយប្រធានាធិបតីសហរដ្ឋអាមេរិក លោក Joe Biden អំពីដំណើរទស្សនកិច្ចរបស់លោកទៅកាន់ប្រទេសអ៊ុយក្រែន ដោយសេតវិមានបានសម្តែងក្តីសង្ឃឹមថា លោកគាំទ្រទស្សនៈរបស់ទីក្រុងគីវ ស្តីពីការបញ្ចប់ការឈ្លានពានរបស់រុស្ស៊ី។ លោក Modi ដែលបានធ្វើឱ្យប្រជាជនអ៊ុយក្រែនមានកំហឹងដោយការឱបប្រធានាធិបតីរុស្ស៊ីលោក Vladimir Putin ក្នុងទីក្រុងមូស្គូកាលពីពេលថ្មីៗនេះ បានធ្វើទស្សនកិច្ចទៅកាន់ទីក្រុងគីវ កាលពីថ្ងៃសុក្រសប្តាហ៍មុន។

សេចក្តីថ្លែងការណ៍របស់ក្រសួងការបរទេសឥណ្ឌាបាននិយាយថា ដោយថ្លែងទៅកាន់លោក Biden តាមទូរស័ព្ទ លោក Modi បានបញ្ជាក់ឡើងវិញនូវជំហរមិនផ្លាស់ប្តូររបស់ប្រទេសឥណ្ឌាក្នុងការគាំទ្រចំពោះការសន្ទនា និងផ្នែកការទូត ហើយបានសម្តែងការគាំទ្រពេញលេញចំពោះសន្តិភាព និងស្ថិរភាព។ នៅពេលត្រូវបានសួរអំពីការឆ្លើយតបរបស់លោក Biden អ្នកនាំពាក្យក្រុមប្រឹក្សាសន្តិសុខជាតិ លោក John Kirby បាននិយាយថា សហរដ្ឋអាមេរិក បានគាំទ្រប្រទេសទាំងអស់ដែលស្តាប់ទស្សនៈរបស់លោក Zelenskyy អំពីការបញ្ចប់សង្គ្រាម។

លោក Kirby បានប្រាប់អ្នកសារព័ត៌មានថា «យើងស្វាគមន៍ប្រទេសនានាដែលចង់ជួយប្រធានាធិបតី លោក Zelenskyy ធ្វើការឆ្ពោះទៅរកសន្តិភាព»។ សេតវិមាន និយាយថា លោក Modi និងលោក Biden «បានបញ្ជាក់ពីការបន្តគាំទ្ររបស់មេដឹកនាំទាំងពីរចំពោះដំណោះស្រាយដោយសន្តិវិធីនៃជម្លោះ ស្របតាមច្បាប់អន្តរជាតិ ដោយឈរលើមូលដ្ឋាននៃធម្មនុញ្ញអង្គការសហប្រជាជាតិ»។

លោក Zelenskyy បានអំពាវនាវឱ្យមានការប្រគល់ត្រឡប់មកវិញនៃទឹកដីទាំងអស់ដែលរុស្ស៊ីដណ្តើមយក ក្នុងពេលបើកការឈ្លានពានពេញលេញលើអ៊ុយក្រែនក្នុងខែកុម្ភៈឆ្នាំ ២០២២ ។

ប្រទេសឥណ្ឌា ពុំបានគាំទ្រជំហររបស់លោក Zelenskyy ច្បាស់លាស់នោះទេ។ ទោះបីជាមានទំនាក់ទំនងជិតស្និទ្ធកាន់តែខ្លាំងជាមួយទីក្រុងវ៉ាស៊ីនតោនក៏ដោយ ក៏ប្រទេសឥណ្ឌា បានបដិសេធមិនចូលរួមក្នុងការដាក់ទណ្ឌកម្មរបស់អាមេរិកលើទីក្រុងមូស្គូ ដែលប្រទេសនេះមានទំនាក់ទំនងជាប្រវត្តិសាស្ត្រ ហើយផ្ទុយទៅវិញបានគាំទ្ររុស្ស៊ីខណៈជាប្រភពប្រេងមានតម្លៃទាប។