អ្នកនាំពាក្យសន្តិសុខជាតិរបស់សេតវិមាន លោក ចន ឃឺប៊ី (John Kirby) បាននិយាយថា ការចរចានៅទីក្រុងគែរ របស់អេហ្ស៊ីប ដើម្បីសម្រេចបានបទឈប់បាញ់នៅហ្កាហ្សា និងកិច្ចព្រមព្រៀងចំណាប់ថ្នូរ នៅតែដំណើរការទៅមុខ ហើយកិច្ចពិភាក្សានឹងបន្តលើកម្រិតក្រុមការងារសម្រាប់ប៉ុន្មានថ្ងៃខាងមុខទៀតដើម្បីដាក់ចេញចំណុចលម្អិតជាក់លាក់។

ថ្លែងទៅកាន់អ្នកសារព័ត៌មាននៅក្នុងសន្និសីទអនឡាញមួយ លោក Kirby បានច្រានចោលការលើកឡើងដែលថាកិច្ចពិភាក្សាបានរង្គោះរង្គើរ ហើយនិយាយថា ផ្ទុយទៅវិញកិច្ចពិភាក្សាស្ថិតក្នុងស្ថានភាពស្ថាបនាយ៉ាងល្អ។ អ្នកនាំពាក្យសន្តិសុខជាតិសេតវិមានរូបនេះ និយាយថា «កិច្ចពិភាក្សាពិតជាបានឈានទៅដល់ចំណុចដ៏ល្អមួយ ដែលជំហានបន្ទាប់គឺឱ្យក្រុមការងារនៅកម្រិតទាបអង្គុយចុះដើម្បីដាក់ចេញព័ត៌មានលម្អិតទាំងនេះ»។

លោក Kirby បន្តថា បញ្ហាមួយក្នុងចំណោមបញ្ហាដែលត្រូវដោះស្រាយដោយក្រុមការងារគឺការដោះដូរចំណាប់ថ្នូរដែលក្រុមហាម៉ាសបានចាប់ខ្លួន និងអ្នកទោសប៉ាឡេស្ទីនដែលអ៊ីស្រាអែលកំពុងឃុំឃាំង។ លោកបន្ថែមថា ព័ត៌មានលម្អិតដែលត្រូវដោះស្រាយរួមមានចំនួនចំណាប់ថ្នូរប៉ុន្មាននាក់ដែលអាចត្រូវបានផ្លាស់ប្តូរ អត្តសញ្ញាណរបស់ពួកគេ និងល្បឿននៃការដោះលែងរបស់អ្នកទាំងនោះ។

កិច្ចចរចាបន្តបន្ទាប់ជាច្រើនខែបានបរាជ័យក្នុងការបង្កើតកិច្ចព្រមព្រៀងមួយដើម្បីបញ្ចប់យុទ្ធនាការយោធារបស់អ៊ីស្រាអែលនៅតំបន់ហ្កាហ្សា ឬដោះលែងចំណាប់ថ្នូរនៅសល់ ដែលត្រូវបានចាប់ខ្លួនដោយក្រុមហាម៉ាស នៅក្នុងការវាយប្រហារកាលពីថ្ងៃទី០៧ ខែតុលា ឆ្នាំមុនរបស់ក្រុមសកម្មប្រយុទ្ធមួយនេះលើអ៊ីស្រាអែល ដែលបង្កឱ្យមានសង្រ្គាមហ្កាហ្សាដ៏បង្ហូរឈាមរហូតមកទល់សព្វថ្ងៃ៕