ការិយាល័យរដ្ឋអាជ្ញារបស់ប្រទេសវេណេស៊ុយអេឡា បាននិយាយកាលពីថ្ងៃចន្ទថា ការិយាល័យបានចេញដីកាកោះហៅជាលើកទីពីរមេដឹកនាំគណបក្សប្រឆាំង លោក Edmundo Gonzalez ដើម្បីចូលរួមក្នុងការសាកសួរអំពីគេហទំព័ររបស់គណបក្សប្រឆាំង ដែលបានផ្សព្វផ្សាយលទ្ធផលនៃការបោះឆ្នោតប្រធានាធិបតីដែលមានភាពចម្រូងចម្រាស់របស់ប្រទេស កាលពីខែមុន។

លោក Gonzalez អតីតអ្នកការទូតអាយុ៧៤ ឆ្នាំ ត្រូវបានចេញការកោះហៅលើកដំបូង កាលពីចុងសប្តាហ៍ដើម្បីបង្ហាញខ្លួននៅព្រឹកថ្ងៃច័ន្ទនៅម៉ោង១០ព្រឹកម៉ោងក្នុងស្រុក ប៉ុន្តែពុំបានបង្ហាញខ្លួនតាមម៉ោងកំណត់នោះទេ។

ដីកាកោះហៅលើកទី២ ដែលបង្ហោះតាមប្រព័ន្ធផ្សព្វផ្សាយសង្គម ដោយការិយាល័យរដ្ឋអាជ្ញា អំពាវនាវឱ្យលោកបង្ហាញខ្លួននៅថ្ងៃអង្គារ ទី២៧ សីហា នេះ ដើម្បីផ្តល់សក្ខីកម្មអំពីការ បន្លំតួនាទីរបស់អាជ្ញាធររៀបចំការបោះឆ្នោត ការក្លែងបន្លំឯកសារផ្លូវការ ការញុះញង់ឱ្យមានសកម្មភាពខុសច្បាប់ និងបទព្រហ្មទណ្ឌផ្សេងៗទៀត។

អាជ្ញាធររៀបចំការបោះឆ្នោតជាតិរបស់ប្រទេសវេណេស៊ុយអេឡា និងតុលាការកំពូលរបស់ខ្លួន បានតែងតាំងប្រធានាធិបតី លោក Nicolas Maduro ជាអ្នកទទួលជ័យជម្នះក្នុងការការបោះឆ្នោតកាលពីថ្ងៃទី២៨ ខែកក្កដា ដោយទទួលបានសំឡេងជាងពាក់កណ្តាល ប៉ុន្តែចំនួនសរុប ដែលបានបង្ហោះនៅលើគេហទំព័ររបស់គណបក្សប្រឆាំង បង្ហាញពីជ័យជម្នះយ៉ាងច្រើនសម្រាប់ លោក Gonzalez ។

គណបក្សប្រឆាំង បណ្តាប្រទេសលោកខាងលិចមួយចំនួន និងស្ថាប័នអន្តរជាតិ ក៏ដូចជាគណៈកម្មការជំនាញរបស់អង្គការសហប្រជាជាតិ បាននិយាយថា ការបោះឆ្នោតពុំមានតម្លាភាព និងទាមទារឱ្យមានការចេញផ្សាយលទ្ធផលសរុបពេញលេញដោយអាជ្ញាធររៀបចំការបោះឆ្នោត ដោយមួយចំនួន រិះគន់ថាមានការក្លែងបន្លំ។ មន្ត្រីគណបក្សកាន់អំណាច រួមទាំងលោក Maduro បានចោទប្រកាន់ក្រុមប្រឆាំងពីបទបង្កអំពើហិង្សា ហើយរដ្ឋអាជ្ញា លោក Tarek Saab បានបើកការស៊ើបអង្កេតបទព្រហ្មទណ្ឌទៅលើមេដឹកនាំបក្សប្រឆាំង លោកស្រី Maria Corina Machado លោក Gonzalez និងគេហទំព័រ កាលពីដើមខែនេះ។ មានការតវ៉ាជាច្រើន ចាប់តាំងពីការបោះឆ្នោត ដែលបានបណ្តាលឱ្យមានមនុស្សស្លាប់យ៉ាងហោចណាស់ ២៧ នាក់ និងបានចាប់ខ្លួនមនសុ្ស ២.៤០០ នាក់។