ទីក្រុងគីវ បាននិយាយថា រុស្ស៊ី បានវាយប្រហារអ៊ុយក្រែន ដោយប្រើមីស៊ីល និងយានដ្រូនសរុបជាង ២០០គ្រឿងកាលពីថ្ងៃចន្ទ (២៦ សីហា) ដោយបានសម្លាប់មនុស្ស ៧នាក់ និងបំផ្លិចបំផ្លាញរោងចក្រថាមពលទូទាំងប្រទេស ក្នុងការវាយប្រហារដ៏ធំបំផុតនៃសង្រ្គាម ខណៈសមាជិកណាតូដែលនៅជិតខាងគឺប៉ូឡូញ រាយការណ៍ថាយានដ្រូនប្រហែលជាចូលក្នុងដែនអាកាសរបស់ខ្លួន។

ការដាច់ចរន្តអគ្គិសនី និងការផ្គត់ផ្គង់ទឹកកើតមាននៅក្នុងតំបន់ជាច្រើន រួមទាំងផ្នែកខ្លះនៃរដ្ឋធានីគីវ ខណៈក្រុមមន្ត្រីនិយាយថា ការវាយប្រហារនេះដាក់គោលដៅលើបណ្ដាញថាមពល ឬហេដ្ឋារចនាសម្ព័ន្ធសំខាន់ៗផ្សេងទៀតទូទាំងប្រទេស។

រុស្ស៊ី បានបង្កើនការវាយប្រហាររបស់ខ្លួនលើបណ្តាញអគ្គិសនីអ៊ុយក្រែន កាលពីខែមីនា នៅក្នុងអ្វីដែលទីក្រុងគីវនិយាយថា មើលទៅហាក់ដូចជាកិច្ចខិតខំប្រឹងប្រែងដ៏ម៉ឹងម៉ាត់មួយដើម្បីបំផ្លាញប្រព័ន្ធថាមពលនៅមុនរដូវរងាមកដល់ ក្នុងពេលដែលមនុស្សត្រូវការប្រើប្រាស់អគ្គិសនីខ្លាំងបំផុត។

មេបញ្ជាការកងទ័ពអាកាស លោក មីកូឡា អូឡេសឆាក់ (Mykola Oleshchuk) បាននិយាយនៅលើបណ្ដាញតេឡេក្រាមថា កងទ័ពអាកាសអ៊ុយក្រែនបានបាញ់ទម្លាក់មីស៊ីល ១០២គ្រាប់ក្នុងចំណោម ១២៧គ្រាប់ដែលបានបាញ់ និងយានដ្រូន ៩៩គ្រឿងក្នុងចំណោម ១០៩គ្រឿង ដោយពណ៌នាថាជា «ប្រតិបត្តិការដ៏ធំបំផុត» នៃសង្គ្រាម។

ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បាននិយាយថាមាន «ការខូចខាតជាច្រើននៅក្នុងវិស័យថាមពល»។ ក្រសួងការពារជាតិរុស្ស៊ីនិយាយថា កងកម្លាំងរបស់ខ្លួនបានប្រើប្រាស់អាវុធដែលមានភាពជាក់លាក់ខ្ពស់ដើម្បីវាយប្រហារទៅលើហេដ្ឋារចនាសម្ព័ន្ធថាមពលសំខាន់ៗនៅអ៊ុយក្រែន ដែលខ្លួនអះអាងថាគាំទ្រដល់មូលដ្ឋានឧស្សាហកម្មយោធា៕