បើទោះពីជាមានការរីករាលដាលនៃជំងឺអុតស្វា និងការកើនឡើងនូវករណីនៃជំងឺកូវីដ-១៩ នៅក្នុងប្រទេសផ្សេងៗ ជុំវិញពិភពលោកក៏ដោយ ក៏អ្នកជំនាញសុខភាពដ៏លេចធ្លោ ២រូប បានលើកឡើងថា វាមិនមែនជាមូលហេតុចម្បងនៃការព្រួយបារម្ភនោះទេ នាពេលនេះ។

គួរបញ្ជាក់ថា ការរីករាលដាលនៃជំងឺអុតស្វា បានបង្កឲ្យមានការព្រួយបារម្ភមួយចំនួន នៅជុំវិញពិភពលោកក្នុងប៉ុន្មានសប្តាហ៍ថ្មីៗនេះ ដោយអង្គការសុខភាពពិភពលោក (WHO) និងមជ្ឈមណ្ឌលគ្រប់គ្រង និងការពារជំងឺរបស់តំបន់អាហ្វ្រិក (Africa CDC) បានប្រកាសថា វាគឺជាគ្រាអាសន្នសុខភាពសាធារណៈនៃការព្រួយបារម្ភជាអន្តរជាតិ និងសម្រាប់ទ្វីបរៀងៗខ្លួន។

គិតត្រឹមសប្តាហ៍មុន CDC របស់តំបន់អាហ្វ្រិក បានកត់ត្រាករណីជំងឺអុតស្វាចំនួន ២១.៣០៥ករណី ដោយ ៣.៣២៦ករណី ត្រូវបានបញ្ជាក់ និង ១៧.៩៧៩ករណី ស្ថិតក្នុងការសង្ស័យ ហើយមានករណីស្លាប់ចំនួន ៥៩០នាក់ នៅក្នុងប្រទេសអាហ្វ្រិកចំនួន ១៣ នៅឆ្នាំនេះ ដោយសាធារណរដ្ឋប្រជាធិបតេយ្យកុងហ្គោមានចំនួន ៩៦ភាគរយនៃករណីទាំងអស់ និង ៩៧ភាគរយនៃចំនួនអ្នកស្លាប់ទាំងអស់។ ថ្មីៗនេះ ករណីជំងឺនេះត្រូវបានបញ្ជាក់នៅក្នុងប្រទេសជុំវិញពិភពលោក ដែលរួមមានប៉ាគីស្ថាន ថៃ ហ្វីលីពីន អូស្ត្រាលី និងស៊ុយអែត។

តែទោះជាយ៉ាងណានេះក្ដី សម្រាប់តំបន់អឺរ៉ុប មជ្ឈមណ្ឌលបង្ការ និងគ្រប់គ្រងជំងឺរបស់អឺរ៉ុប (ECDC) ជឿថា កម្រិតនៃហានិភ័យបច្ចុប្បន្ន នៅតែមាន «កម្រិតទាប»។ លោក Bruno Ciancio ប្រធានផ្នែកឃ្លាំមើលរបស់ទីភ្នាក់ងារនេះ បានប្រាប់សារព័ត៌មាន Anadolu ថា៖ «ECDC វាយតម្លៃហានិភ័យ សម្រាប់ប្រជាជនអឺរ៉ុបថា មានកម្រិតទាប»។ លោកបានសង្កត់ធ្ងន់ថា មេរោគជំងឺងុតស្វា មាន «ច្រើនទសវត្សរ៍មកហើយ» ហើយមាន «វ៉ាក់សាំងដែលមានប្រសិទ្ធភាព និងសុវត្ថិភាព» សម្រាប់បង្ការជំងឺនេះ។

ដោយឡែកទាក់ទងនឹងការរីករាលដាលនៃករណីជំងឺកូវីដ-១៩ នៅអឺរ៉ុប ជាពិសេសនៅក្នុងប្រទេសបារាំង ក្នុងអំឡុងពេលកីឡាអូឡាំពិក នៅទីក្រុងប៉ារីសដែលទើបនឹងបញ្ចប់ថ្មីៗនេះ លោក Ciancio បានលើកឡើងថា ECDC បានសង្កេតឃើញនូវ «និន្នាការដ៏គួរឲ្យបារម្ភ» នោះឡើយ ហើយ «ស្ថានភាពជំងឺរាតត្បាតបច្ចុប្បន្ន មិនតម្រូវឲ្យមានគោលនយោបាយបន្ថែមលើសពីអ្វីដែលមានរួចស្រាប់ហើយនោះទេ»៕